Innlent | mbl | 25.8.2014 | 17:14

Skjálfti upp á 5,1 í Bárðarbungu

mbl.is/Árni Sæberg

Jarðskjálfti af stærðinni 5,1 varð suðaustur af Bárðarbungu klukkan 16:19 að því er fram kemur á vef Veðurstofu Íslands. Skjálftavirkni er enn mjög mikil, rúmlega 700 skjálftar hafa mælst frá miðnætti.

Almannavarnadeild ríkislögreglustjóra segir í stöðuskýrslu að virknin þokist áfram til norðurs og sé að mestu á 10 km löngu bili, með miðju undir jökuljaðrinum.

Klukkan 20:39 í gærkvöldi mældist skjálfti af stærðinni 5 í Bárðarbunguöskjunni, en síðan hafa ekki orðið stórir skjálftar þar. Berggangurinn undir Dyngjujökli er nú talinn vera um 35 km langur. Líkanreikningar byggðir á GPS-mælingum benda til að um 300 milljón rúmmetrar af kviku séu í ganginum. GPS-mælum verður bætt við norðan við Vonarskarð og á Urðarhálsi á næstu dögum.

Tekið er fram að engar vísbendingar séu um að dregið hafi úr ákafa atburðanna. Ekki sé hægt að segja til um það á þessari stundu hvert framhaldið verður. Þrír möguleikar eru taldir líklegastir:

Að innflæði kviku stöðvist og skjálftahrinan fjari út og ekki komi til eldgoss.
Gangurinn nái til yfirborðs og eldgos hefjist. Líklegast er að það verði við norðurenda gangsins. Þá er líklegast að verði hraungos með nokkurri sprengivirkni.
Gangurinn nái til yfirborðs og eldgos hefjist en verulegur hluti eða öll sprungan verði undir Dyngjujökli. Gosið myndi leiða til jökulhlaups í Jökulsá á Fjöllum og e.t.v. einnig sprengigoss með öskufalli.

Ekki er hægt að útiloka aðrar sviðsmyndir t.d. gos í Bárðarbunguöskjunni en líkur á því eru mun minni á þessari stundu.

Lokanir eru í gildi á hálendinu norðan Vatnajökuls. Búið er að opna Hólsfjallaveg (F864) austan Jökulsársgljúfurs frá þjóðvegi 1 að vegi 85. Einnig er búið að opna fyrir umferð inn í Ásbyrgi.