Með nýjustu tækni eru ósæðarlokuskipti í hjarta framkvæmd í gegnum gat á náraæð sjúklingsins í stað opinnar hjartaaðgerðar.
„Þessi aðgerð opnar fyrir þann möguleika að veita fleiri sjúklingum meðferð við alvarlegum sjúkdómi,“ segir Ingibjörg Guðmundsdóttir hjartalæknir á Landspítalanum, sem ásamt Þórarni Guðnasyni er í öflugu teymi lækna og hjúkrunarfræðinga sem hafa gert aðgerðirnar.
Teymið hefur meðal annars verið undir handleiðslu dansks hjartalæknis. Ríflega 30 slíkar aðgerðir hafa verið gerðar hér á landi undanfarið. Aðgerðirnar heppnuðust tæknilega vel og er líðan sjúklinga góð, að því er fram kemur í umfjöllun um þessa lækninganýjung í Morgunblaðinu í dag.