Rafbílaeigendur komust í dag í heimsmetabók Guinnes fyrir lengstu samfelldu röð rafbíla en alls óku rúmlega 220 rafbílar í bílalest yfir Eyrarsundsbrúnna frá Malmö til Kaupmannahafnar í dag. Þar með slógu þeir heimsmetið sem var 100 rafbílar samfellt og sett var í Japan árið 2010.
Magnús Garðarsson, framkvæmdastjóri United Silicon sem byggir kísilverksmiðjuna í Helguvík, var í hópi rafbílaökumannanna sem settu heimsmetið í dag, en Magnús er búsettur í Kaupmannahöfn. Mætti hann á rafbíl sínum, Tesla Model S, ásamt dætrum sínum Isabellu og Alexöndru.
„Það var sannarlega skemmtilegt að taka þátt í þessum merka viðburði. Það var gríðarlegur áhugi á þessu á meðal rafbílaeigenda í Danmörku og Svíþjóð. Rafbílaeigendur í Danmörku hittust í Kaupmannahöfn og óku yfir brúna til Malmö þar sem við hittum sænska rafbílaeigendur. Síðan ók allur bílaflotinn saman yfir Eyrarsundsbrúnna til Kaupmannahafnar. Þetta var sannarlega flottur bílafloti,“ segir Magnús.