Ísland hætti að nota jarðefnaeldsneyti

Sigmundur Davíð Gunnlaugsson forsætisráðherra hvetur þjóðir heims til að ganga til liðs við alheimsbandalag á sviði jarðhitanýtingar. Þá tilkynnti hann í dag um stuðning íslenskra stjórnvalda til sérstakrar jarðhitaáætlunar sem er unnin í samvinnu við Alþjóðabankann.

Þetta kom fram í ræðu sem Sigmundur flutti á leiðtogafundi Sameinuðu þjóðanna um loftlagsmál, en fundurinn fór fram í New York. Þar fór hann yfir áherslur Íslands í loftlagsmálum. Hann sagði m.a. í upphafi ræðu sinnar, að stefnt sé að því að Ísland muni hætta að nota jarðefnaeldsneyti og einblínt verði á endurnýjanlega orkugjafa í framtíðinni. Sú vinna sé þegar hafin.

Fram kemur í tilkynningu frá utanríkisráðuneytinu, að Sigmundur Davíð hafi ennfremur tilkynnt um stuðning Íslands við átakið „Endurnýjanleg orka fyrir alla“ sem aðalframkvæmdastjóri Sameinuðu þjóðanna hefur beitt sér fyrir, sem og að metnaðarfullur og bindandi loftslagssamningur náist í París á næsta ári.

Sigmundur Davíð áréttaði ennfremur mikilvægi þess að sporna gegn súrnun sjávar og minnti á þróun mála á norðurslóðum sökum hlýnunar loftslags. Þá fjallaði ráðherra um mikilvægi þess að kraftar ólíkra hópa fólks og beggja kynja  séu nýttir í baráttunni gegn neikvæðum loftslagsbreytingum. 

Á morgun mun forsætisráðherra taka þátt í setningu allsherjarþings Sameinuðu þjóðanna og flytja erindi á ársfundi Íslensk – ameríska verslunarráðsins um samskipti Íslands og Bandaríkjanna.

• 3 blogg um fréttina

Bloggað um fréttina

• Ármann Birgisson: Hvað með olíuna á Drekasvæðinu ? ? ?.
• Axel Jóhann Hallgrímsson: Höfuðvandi Framsóknar er flokkurinn sjálfur
• Ómar Bjarki Smárason: Það eyðist sem af er tekið!