Túnfiskur fastur í geymslu

Nýlega var landað hér á landi túnfiskum sem fengust sem meðafli við makrílveiðar í grænlenskri lögsögu. Fiskarnir voru fluttir í frystigeymslu og eru fastir hér á landi að því er virðist.

Eigendur skipsins mega ekki flytja fiskana til neyslu í Grænlandi og hugsanlega verða þeir gefnir til góðgerðarmála því samkvæmt samþykktum Atlantshafstúnfiskveiðiráðsins (ICCAT) mega aðildarríkin ekki leyfa löndun, sölu eða endurútflutning á afla sem ekki fylgir veiðivottorð.

Samkvæmt upplýsingum Brynhildar Benediktsdóttur, sérfræðings á sviði auðlindanýtingar í sjávarútvegsráðuneytinu, vissu íslensk stjórnvöld ekki af þessum túnfiskum við löndun. „Það var ekki fyrr en menn sáu túnfiskinn á bryggjunni, að þeir áttuðu sig á hvers kyns var,“ segir Brynhildur.