Börnin á leikskólanum Ástúni á Breiðdalsvík dvelja innandyra í dag vegna mengunar á svæðinu sem berst frá gosstöðvunum í Holuhrauni.

Á Facebook-síðu Almannavarna ríkisins kemur fram að dimmt sé yfir í Breiðdalnum, fólk hafi fundið fyrir ertingu í augum og öndunarfærum og því sé nauðsynlegt að börn og þeir sem eru með asma eða aðra undirliggjandi sjúkdóma haldi sig innandyra á meðan mengunin gengur yfir.

Guðný Jónasdóttir, leikskólastjóri á Ástúni, segir að börnin hafi farið út í morgun. Þá hafi mengunarinnar ekki verið vart en síðan fór að blása og glittir nú aðeins í útlínur fjallanna í gegnum bláa móðu.

Guðný segir að starfsmennirnir hafi ekki mikið fundið fyrir menguninni en þegar í ljós kom að gildin voru orðin há og mengunin var sýnileg á svæðinu var ákveðið að hafa börnin inni í dag. Sex börn eru leikskólanum.

Þetta er í annað skiptið sem starfsmennirnir hafa þurft að hafa börnin inni vegna mengunar frá því að gosið hófst fyrir rúmum mánuði.

Tengdar fréttir

Bárðarbunga

3,5 stiga skjálfti í Bárðarbungu

• Skjálftinn reyndist enn stærri en talið var
• Annar stór skjálfti í Bárðarbungu
• Tveir skjálftar í Bárðarbungu
• Skjálfti upp á 5 í Bárðarbungu

» Fleiri tengdar fréttir

• Blogga um frétt