Innlent | mbl | 17.10.2014 | 10:54 | Uppfært 11:17

Segir forsætisráðherra óttast staðreyndir

Helgi Hjörvar, þingmaður Samfylkingarinnar, í pontu á Alþingi í gær. Sigmundur Davíð Gunnlaugsson forsætisráðherra (t.v.) gagnrýndi ræðu Helga og sagði hann fara rangt með. mynd/Alþingi

Helgi Hjörvar, þingmaður Samfylkingarinnar, segir að Sigmundur Davíð Gunnlaugsson forsætisráðherra sé hræddur við staðreyndir og að hann hafi ekki getað bent á eitt einasta dæmi sem hafi verið rangt í ræðu sinni í óundirbúnum fyrirspurnartíma á Alþingi í gær, en ráðherra fullyrti að allt sem Helgi sagði hefði verið rangt.

Helgi segir í tilkynningu sem hann sendi á fjölmiðla að Sigmundur Davíð hefði haldið því fram að hann hefði ekki farið með eitt atriði rétt í ræðu sinni um hag heimilanna á Alþingi í gær.

Helgi segir að efnisatriði ræðunnar hafi verið rétt og „staðreyndirnar það sem olli uppnámi Sigmundar“.

Þá segir hann að þegar forsætisráðherra fari fram með slík stóryrði sé nauðsynlegt að greina hvað hann eigi við.

Hver fyrir sig geti metið staðreyndir málsins

„Með fréttatilkynningu þessari eru listuð upp þau tíu efnisatriði sem fram komu í 2ja mínútna ræðu minni og raktar heimildir og útreikningar að baki hverju og einu. Þá fylgir útskrift ræðu minnar svo allir geta kannað sjálfir hvort efnisatriðin séu rétt tekin upp úr ræðunni, skoðað heimildirnar og farið í gegnum útreikningana til að ganga úr skugga um að hér sé rétt farið með. Þannig getur líka hver fyrir sig metið hvort hér séu staðreyndir sem Sigmundur vill ekki að ég tali um,“ segir Helgi.

Hann vísar til eftirfarandi atriða sem hafi komið fram í ræðu hans í gær

Að Framsóknarflokkurinn hafi fyrir kosningar sagt að hrægammar ættu að greiða kostnað við skuldalækkun heimilanna. Sbr. t.d. SDG sjálfan í leiðtogaumræðum í sjónvarpi 2. apríl 2013, sjá m.a. hér: http://eyjan.pressan.is/frettir/2013/04/02/fyrstu-sjonvarpsumraedurnar-sigmundur-david-fjarlaegist-bjarna-hver-fannst-ther-skara-fram-ur/
Að nú ættu heimilin að bera byrðarnar. Sjá rökstuðning um matarskatt og vaxtabætur hér að neðan.
Að fyrirhuguð skuldalækkun heimilanna nemur 5% af skuldum þeirra.

Helgi heldur því fram, að það sé raunar enn minna því samkvæmt tölum Hagstofunnar hafi skuldirnar numið 1.927 milljörðum í árslok 2013. Samkvæmt fjármálaráðuneytinu nemi niðurfærslan 73 milljörðum auk annars kostnaðar og niðurfelling nemi því 3,8% af skuldum heimilanna. http://hagstofa.is/Pages/95?NewsID=10998

Helgi heldur svo áfram að tína til atriði.

Að Framsóknarflokkurinn hafi kynnt tillögu um 5% hækkun matarskatts. Sbr. t.d. þingmálaskrá ríkisstjórnarinnar og stjórnarfrumvarp á þingskjali nr. 2. http://www.althingi.is/altext/144/s/0002.html
Að meðallækkun skulda í niðurfærslunni sé um ein milljón kr. á heimili.

Helgi segir, að alls hafi u.þ.b. 69.000 heimili sótt um leiðréttingu: http://www.fjarmalaraduneyti.is/frettir/nr/18423

Hann segir að niðurfærslan nemi 73 milljörðum, auk vaxtakostnaðar næstu ára og sú tala deilt á 69 þúsund heimili geri 1.057.971 kr. að meðaltali á heimili ef allir fá eitthvað.

Hann heldur áfram:

Að lækkun skuldar um 1 milljón lækkar greiðslubyrði um 5.000 kr. á mánuði.

Helgi segir að fyrsta greiðsla af einnar milljón króna verðtryggðu láni til 40 ára hjá Lífeyrissjóði starfsmanna ríkisins sé í dag 3.919 kr. Meðalgreiðsla af sama láni sé 5.633 kr. Sjá reiknivél á heimasíðu LSR, http://www.lsr.is/lan/lanareiknivel/

Að matarskattur hjá heimili með 100 þús. kr. matarreikning hækkar um 5.000 kr. Hver og einn getur sannreynt á vasareikni sínum að 100.000 kr. matarreikningur fyrir vsk. er með 7% vsk. 107 þúsund en verður með 12% vsk. 112 þúsund eða 5 þúsund krónum hærri.
Að vaxtabætur hafa lækkað um 13 milljarða frá 2011 þegar þær voru mestar.

Þá segir Helgi, að árið 2011 hafi verið greiddir út 19 milljarðar í vaxtabætur og sérstaka vaxtaniðurgreiðslu sem geri 21,3 milljarða á núvirði. Samkvæmt. fjárlagafrumvarpinu 2015 sé gert ráð fyrir að vaxtabætur nemi 7,7 milljörðum kr. eða 13,6 milljörðum minna en 2011.

Að þessir 13 milljarðar séu þrír fjórðu hlutar þeirrar fjárhæðar sem verja eigi í niðurfærsluna á næsta ári. Fjórðungur 73 milljarða niðurfærslunnar sem kemur til framkvæmda 2015 nemur 18,25 milljörðum. 13,6 milljarðar eru 74,52% af þeirri fjárhæð eða þrír fjórðu.
Að eiginfjárstaða heimilanna styrktist um 638 milljarða frá 2010-2013. Sjá frétt Morgunblaðsins: http://www.mbl.is/frettir/innlent/2014/10/01/jokst_um_638_milljarda/.

Geti ekki leyft sér að hrópa ósannindi

Að lokum tekur Helgi fram, að það sé auðvitað viðkvæmt fyrir forsætisráðherra að bent sé á að niðurfærslan sé ekki nema 3,8% af skuldum heimilanna. Líka að hærra matarverð og lægri vaxtabætur rýri á móti kjör fólks. Þá ekki síst að þeir 18 milljarðar sem verja eigi úr ríkissjóði á næsta ári til niðurfærslunnar vegi lítið þegar eiginfjárstaða heimilanna hafi styrkst um 638 milljarða frá 2010 til 2013.

„En þótt Sigmundur hræðist umræðu um staðreyndir getur forsætisráðherra ekki leyft sér að hrópa ósannindi um staðreyndir sem bent er á. Enn síður þegar hann hefur ekki bent á eitt, hvað þá öll, atriðin því til stuðnings,“ segir Helgi Hjörvar.