Skurðlæknafélag Íslands mun hefja verkfallsaðgerðir á morgun og munu þær standa yfir fram á fimmtudag. Næsti fundur í kjaradeilunni er ekki boðaður fyrr en á miðvikudag.

Tæp­lega 90 lækn­ar eru í fé­lag­inu og falla all­ar skipu­lagðar aðgerðir niður þá daga sem verk­fallið stend­ur yfir. Aðeins bráðatil­vik­um verður sinnt þessa daga. 

Lilja Stefánsdóttir, framkvæmdastjóri á skurðlækningasviði Landspítalans segir skurðlækningasviðið vera það svið spítalans sem finnur hvað mest fyrir áhrifum verkfallsins. „Sumir unglæknarnir okkar eru í læknafélaginu, skurðlæknarnir eru í skurðlæknafélaginu og svo eru svæfingalæknarnir á aðgerðasviði, svo allir verkfallsliðir hafa áhrif á þá sem þurfa skurðaðgerðir. Þetta yfirtekur alla starfsemi.“

Þá segir hún heildaráhrif verkfallsins vera mjög umfangsmikil. „Þetta er eitt allsherjar ófremdarástand,“ segir hún. „Heildaráhrifin eru þau að fyrir hvern einasta dag sem ekki er unnið af fullu blasti þá lengjast biðlistarnir sem því nemur.“

Lilja segir það skapa gríðarlegt álag á bæði sjúklinga og starfsfólk að láta þetta ganga upp. „En fólk gerir það á eins ábyrgan hátt og það getur frá degi til dags.“ Þá segir hún afleiðingar verkfallsins vera miklar, og langan tíma muni taka að byggja kerfið upp að nýju.

Á vef Landspítalans er farið ítarlega yfir áhrif verkfallsins á deildir spítalans. Þar segir að helstu áhrif verkfalla á skurðlækningasviði séu eftirfarandi:

• Starfsemi bráðalegudeilda verður eins og um helgar. Öllum bráðatilvikum verður sinnt eins og venjulega þessa verkfallsdaga.
• Starfsemi á skurðstofum miðast við bráðastarfsemi.
• Göngudeildir skurðlækna verða lokaðar dagana 18-20. nóvember. Undir þær heyra göngudeild almennra skurðlækna (10E), göngudeild þvagfæralækninga (11A), göngudeild bæklunarlækninga (G3), göngudeild háls-, nef- og eyrnalækninga HNE (B3), göngudeild lýtalækninga (B3), göngudeild æðaskurðlækninga og göngudeild heila- og taugaskurðlækninga (B3). Göngudeildarkomur til annarra en lækna haldast óbreyttar.
• Ekki verður hægt að undirbúa sjúklinga fyrir aðgerð á innskriftarmiðstöð (10E og B3) verkfallsdagana. Símainnskrift svæfingarhjúkrunarfræðinga verður í eðlilegum farvegi. 

Eins og fram hef­ur komið fer Skurðlækna­fé­lag Íslands fram á upp und­ir 100% hækk­un á grunn­laun­um ný­út­skrifaðra sér­fræðinga í kjaraviðræðum við ríkið. 

Fé­lagið fer fram á að laun skurðlækna hér á landi verði svipuð og þau eru í ná­granna­lönd­un­um. Ekki er óal­gengt að ný­út­skrifaður sér­fræðing­ur í Svíþjóð fái 60 til 70 þúsund sænsk­ar í laun á mánuði, en það er rétt rúm millj­ón í ís­lensk­um krón­um. Ný­út­skrifaður sér­fræðing­ur á Íslandi er með um hálfa millj­ón í grunn­laun.

Tengdar fréttir

Læknadeilan

Fjölgun bendir til heimkomu lækna

• Draga uppsagnirnar til baka
• Grunnlaun eru 62,7% af meðaltekjum
• Meirihlutinn hættur við uppsögn
• Tveir læknar hafa dregið uppsagnir til baka

» Fleiri tengdar fréttir

• 1 blogg um fréttina

Bloggað um fréttina

• Wilhelm Emilsson: Þetta gengur ekki