Mistök við útreikning einkunna

Komið hefur í ljós að mistök voru gerð við útreikning einkunna í samræmdu könnunarprófi í stærðfræði í 4. bekk nú í haust. Rangt var gefið fyrir fjórar spurningar sem getur haft þau áhrif að það muni allt að einum heilum í einkunnum nemenda.

Þetta kemur fram í tilkynningu frá Námsmatsstofnun.

Námsmatsstofnun leiðrétti strax svarblað fyrir viðkomandi stærðfræðipróf á heimasíðu sinni og hóf vinnu við að endurreikna einkunnir allra nemenda. Leiðréttar einkunnir hafa nú verið færðar í gagnagrunn og eru aðgengilegar fyrir skóla. Allir grunnskólar munu nú afhenda nemendum leiðrétt einkunnablöð.

Ekki heimilt að lækka áður útgefnar einkunnir

Samkvæmt lögfræðiáliti er Námsmatsstofnun ekki heimilt að lækka áður útgefnar einkunnir til nemenda á samræmdum könnunarprófum. Því breytast niðurstöður sem birtar eru nemendum einungis til hækkunar en einkunnir lækka ekki. Hins vegar munu heildarniðurstöður fyrir landið allt, landssvæði og einstaka skóla vera byggðar á réttum tölum.

Þessar leiðréttingar leiða til hækkunar einkunna 2.058 nemenda af þeim 3.936 sem tóku prófið eða um 52%. Hækkunin var á bilinu 0,5 til 1. Ef til lækkunar hefði komið hefðu einkunnir 293 nemenda lækkað eða um 7,5%.

Námsmatsstofnun harmar þessi mistök og biður viðkomandi nemendur og aðra viðkomandi afsökunar á þeim. Stofnunin er nú að fara aftur yfir öll próf sem lögð voru fyrir nú í haust og mun sannreyna að einkunnir úr þeim séu réttar. Einnig verður farið yfir alla verkferla við úrvinnslu samræmdra könnunarprófa með það að markmiði að koma í veg fyrir mistök
sem þessi í framtíðinni.

• 1 blogg um fréttina

Bloggað um fréttina

• Wilhelm Emilsson: 2+2=5