„Þetta eldgos hagar sér öðru vísi en eiginlega öll þau gos sem við höfum séð hér á undanförnum áratugum.“

Þetta segir Páll Einarsson, jarðeðlisfræðingur og prófessor við Háskóla Íslands í umfjöllun um eldgosið í Holuhrauni í Morgunblaðinu í dag. „Þetta er í rauninni ósköp friðsælt gos. Það gengur bara áfram dag eftir dag með litlum breytingum.“

Páll segir að hægt væri að finna allmarga atburði þar sem askja hefur sigið í tengslum við atburðarás sem er einhvers staðar utan við öskjuna sjálfa. Hann segir að 45 km fjarlægðin á milli Bárðarbungu og gossins í Holuhrauni væri ekki mjög mikil þegar sambærilegir atburðir á heimsvísu væru bornir saman.