Flestir fengið stórkrossinn

Nær allir forsætisráðherrar Íslands hafa fengið stórkross Fálkaorðunnar. Einungis fjórir forsætisráðherrar á lýðveldistímanum, það er frá lýðveldisstofnuninni árið 1944, hafa annað hvort ekki fengið orðuna eða afþakkað hana. Forseti Íslands veitti Sigmundi Davíð Gunnlaugssyni forsætisráðherra orðuna fyrr í mánuðinum.

Ef miðað er við árið 1921 þegar Fálkaorðan var stofnuð hafa sex forsætisráðherrar ekki fengið stórkrossinn miðað við gagnagrunn á vefsíðu forsætisembættisins. Þar á meðal er Magnús Guðmundsson sem var aðeins starfandi forsætisráðherra í nokkra daga árið 1926. Af þeim 24 einstaklingum sem gengt hafa embættinu frá því að Fálkaorðan var sett á laggirnar hafa þannig 18 fengið stórkrossinn. 14 af 18 ef miðað er við lýðveldistímann. Jóhanna Sigurðardóttir afþakkaði stórkrossinn að sögn Guðna Ágústssonar, formanns orðunefndar, og það sama mun hafa átt við um Steingrím Hermannsson.

Forsætisráðherrar sem þannig hafa ekki fengið stórkrossinn eru Jóhanna Sigurðardóttir, Steingrímur Hermannsson, Benedikt Gröndal, Hermann Jónasson, Ásgeir Ásgeirsson og Magnús Guðmundsson. Tveir síðarnefndu voru forsætisráðherrar fyrir lýðveldisstofnunina og Magnús sem fyrr segir var einungis starfandi forsætisráðherra í nokkra daga.

Hér að neðan má sjá lista yfir forsætisráðherra Íslands og hvenær þeim var veittur stórkrossinn.

Forsætisráðherrar                                       Stórkrossinn veittur

Jón Magnússon                                               1921-07-03
Sigurður Eggerz                                              1922-06-19
Magnús Guðmundsson (starfandi)
Jón Þorláksson                                                1929-12-01
Ásgeir Ásgeirsson 

Lýðveldisstofnunin (Björn Þórðarson var forsætisráðherra bæði fyrir og eftir hana)

Björn Þórðarson                                              1949-08-01
Ólafur Thors                                                    1956-03-21
Stefán Jóhann Stefánsson                               1954-02-01
Steigrímur Steinþórsson                                  1953-12-01
Hermann Jónasson
Emil Jónsson                                                   1960-01-22
Bjarni Benediktsson                                         1953-12-01
Jóhann Hafstein                                              1971-04-14
Ólafur Jóhannesson                                         1972-06-17
Geir Hallgrímsson                                            1975-02-24
Benedikt Gröndal
Gunnar Thoroddsen                                         1980-02-26
Steingrímur Hermannsson
Þorsteinn Pálsson                                             1987-06-15
Davíð Oddsson                                                 1991-12-31
Halldór Ásgrímsson                                           2005-03-11
Geir H. Haarde                                                 2006-12-15
Jóhanna Sigurðardóttir 
Sigmundur Davíð Gunnlaugsson                       2014-12-13

• 2 blogg um fréttina

Bloggað um fréttina

• Gunnar Th. Gunnarsson: ALLIR hafa fengið Fálkaorðuna
• Páll Vilhjálmsson: Trú, orður og lögmæti valds