Hlé hefur verið gert á fundi samn­inga­nefnda Lækna­fé­lags Íslands og rík­is­ins sem hófst klukkan 10:30 í morgun. Að sögn Magnúsar Péturssonar, ríkissáttasemjara, munu deiluaðilar hittast aftur klukkan 15, og þá kemur í ljós hvort samningar geti náðst fyrir áramót.

„Við gerðum hlé á fundinum klukkan tólf og ég bað deiluaðila að skoða tiltekin atriði og koma með svör við þeim klukkan þrjú. Þá sjáum við hvort það verði framhald á þessu eða ekki,“ segir Magnús.

Aðspurður hvort um nýja nálgun sé að ræða segir Magnús að „það sé allt nýtt í þessari deilu.“ Þá segist hann vonast til þess að skriður fari að komast á deiluna, en það muni reyna á það seinnipartinn í dag. „Það má segja að viðræður standi yfir á meðan þetta er svona, og ég get búist við því að dagurinn fari í þetta,“ segir hann.

Verk­fallsaðgerðir lækna munu hefjast á ný mánu­dag­inn 5. janú­ar, ná­ist samn­ing­ar ekki. Þær aðgerðir munu hafa mikla rösk­un í för með sér á starf­semi Land­spít­al­ans, enda munu ein­stak­ir hóp­ar lækna þá leggja niður störf í fjóra daga í röð, en ekki í tvo daga í röð eins og fram að þessu.

Verk­fallsaðgerðir lækna, sem hóf­ust þann 27. októ­ber sl., hafa þegar haft í för með sér að hundruð aðgerða á Land­spít­al­an­um hafa fallið niður og biðlist­ar lengst fyr­ir vikið. 

Frá samningafundi í gær. mbl.is/Þórður

Tengdar fréttir

Læknadeilan

Fjölgun bendir til heimkomu lækna

• Draga uppsagnirnar til baka
• Grunnlaun eru 62,7% af meðaltekjum
• Meirihlutinn hættur við uppsögn
• Tveir læknar hafa dregið uppsagnir til baka

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Sprengju varpað inn á viðkvæmri stundu.