„Sjáumst á Íslandi!“

Robert C. Barber er næsti sendiherra Bandaríkjanna á Íslandi. Hann mun afhenda forseta Íslands trúnaðarbréf sitt 28. janúar næstkomandi og taka þar með formlega við embætti sendiherra.

Í stuttu myndbandi sem birtist á Facebook síðu bandaríska sendiráðsins í dag er rætt við sendiherrann um starfsferil hans, ást hans á Nýja Englandi og hafnarbolta, og áætlanir hans um að kynnast landi og þjóð. Ef marka má myndbandið er Barber spenntur fyrir nýja starfinu.

Banda­rísk­ur sendi­herra hef­ur ekki verið hér á landi frá því að Luis E. Arreaga lét af embætti í nóv­em­ber 2013. Eins og fram hefur komið í fyrri fréttum tók Öld­unga­deild Banda­ríkjaþings sér lang­an tíma til þess að samþykkja Barber og fleiri nýja sendi­herra sem til­nefnd­ir höfðu verið af Barack Obama Banda­ríkja­for­seta. Obama skipaði Barber í embættið í októ­ber 2013. Öld­unga­deild­in samþykkti loks skip­un hans fyr­ir jól.

Í myndbandinu tók Barber sig til og spreytti sig á íslensku. Býður hann góðan daginn og segir hversu ánægjulegt og mikill heiður það sé fyrir hann að vera næsti sendiherra Bandaríkjanna á Íslandi.

Sendiherrann færir sig þó fljótlega í enskuna en lýkur myndbandinu með orðunum „Sjáumst á Íslandi!“ á fínni íslensku.

Myndbandið má sjá hér að neðan.

• 2 blogg um fréttina

Bloggað um fréttina

• Ómar Ragnarsson: Gamli brandarinn er ónýtur.
• Haraldur Haraldsson: Sjáumst á Íslandi /Gott að fá hingað sendiherra Bandaríkjana,eftir hneikslið …