Innlent | mbl | 17.1.2015 | 14:34

Laun kvenna hækkuðu meira

Um 100 manns eru á fundinum í Hofi á Akureyri. Ljósmynd/Eining-Iðja

Laun kvenna hjá Einingu-Iðju á Akureyri hafa hækkað heldur meira en karla á síðustu fjórum árum. Þetta kemur fram í launakönnun sem Capacent gerði fyrir Einingu-Iðju í samstarfi við AFL starfsgreinafélag.

Þessar kannanir eru byggðar á sambærilegum könnunum sem Efling, Hlíf og Verkalýðs- og sjómannafélag Keflavíkur hafa látið gera fyrir sig í nokkur ár og því unnt að bera saman niðurstöður að verulegu leyti. Þegar heildarlaun félagsmanna Einingar-Iðju eru skoðuð, þ.e. hjá þeim sem eru í fullu starfi, má sjá að þau eru að meðaltali 372.000 krónur og hafa þau hækkað um 60 þúsund krónur (19,3%) frá því er fyrsta könnunin var gerð haustið 2011. Ef meðal heildarlaun svarenda eru skoðuð milli kynja, þá eru karlmenn með kr. 409.262 en voru í fyrra kr. 396.607. Konurnar eru með kr. 338.313 en í fyrra var upphæðin kr. 302.066. Hækkunin á tímabilinu er heldur meiri hjá körlum heldur en konum. Þannig hafa heildarlaun karla hækkað um 73 þúsund á síðustu tveimur árum eða um 21,6% meðan heildarlaun kvenna hafa hækkað um 56 þúsund krónur eða 20,0%. Ef aðeins er skoðuð hækkun milli áranna 2013 og 2014 á heildarlaunum þá hækkuðu karlar að meðaltali um 3,2% en konur um 12%.

Í könnuninni kom fram að 65% félagsmanna segjast styðja hugsanlegar verkfallaaðgerðir, þurfi á annað borð að grípa til þess ráðs.

í dag hefur staðið yfir í Hofi á Akureyri fundur hjá Einingu-Iðju þar sem rúmlega 100 félagsmenn fara yfir ýmis mál varðandi kjaraviðræður sem framundan eru. Um er að ræða sjöunda fundinn sem félagið hefur staðið fyrir á öllu félagssvæðinu í vikunni. Fyrstu fundirnir sex voru haldnir á Akureyri, Grenivík, Hrísey, Ólafsfirði, Dalvík og Siglufirði og voru opnir öllum félagsmönnum. Þessir fundir eru m.a. tækifæri fyrir alla félagsmenn til að koma fram með hugmyndir að launakröfum félagsins í kröfugerð sem send verður til samninganefndar Starfsgreinafélagsins í næstu viku.

Fundurinn í dag er með svokölluðu þjóðfundarfyrirkomulagi, en með því fyrirkomulagi ná vonandi sem flest sjónarmið að koma fram, enda um að ræða afkomu almenns launafólks næstu misserin. Á fundinn voru boðaðir félagsmenn sem sitja í samninganefnd félagsins, trúnaðarráði auk trúnaðarmanna sem ekki sitja í þessum nefndum. Í byrjun fundar kynnti Sigríður Ólafsdóttir frá Capacent niðurstöður kjarakönnunar sem gerð var fyrir félagið. Ólafur Darri Andrason, hagfræðingur hjá ASÍ, var að ljúka við að fara yfir laun og launaþróun í aðdraganda kjarasamninga. Eftir hádegi verður unnið í hópum þar sem rætt verður út frá sömu spurningum og lagðar voru fyrir á fundunum sex búið var að halda í vikunni, m.a um launahækkanir og lengd samnings. Eyrún Björk Valsdóttir, deildarstjóri fræðsludeildar ASÍ, skipulagði vinnuna og mun hafa yfirumsjón með henni.

Góð samheldni á fundinum

Björn Snæbjörnsson, formaður félagsins og SGS, segist vera mjög ánægður með þá mætingu sem félagið hefur fengið á fundina. „Það er mjög góð samheldni á þessum fundi. Menn ræða um ýmislegt, krónutöluhækkanir, verðbólgu og það sem aðrir hafa verið að semja um.“

Verkalýðshreyfingin er að undirbúa kjaraviðræður við atvinnurekendur, en kjarasamningar eru lausir í vetur. Björn segir þá góðu umræðu sem farm hafi farið á fundunum veita samningamönnum aukinn kraft til að fara í þá vinnu sem framundan. Samstaða sé númer eitt, tvö og þrjú.