Lægstu laun verði 300 þúsund

Samninganefnd Starfsgreinasambands Íslands afhenti Samtökum atvinnulífsins í dag kröfugerð sína vegna komandi kjarasamninga. Meginkröfur eru þær að miða krónutöluhækkanir á laun við að lægsti taxti verði 300 þúsund krónur á mánuði innan þriggja ára.

Að öðru leyti eru meginkröfur að:

• endurskoðaðar verði launatöflur þannig að starfsreynsla og menntun séu metin til hærri launa.

• desember- og orlofsuppbætur hækki.

• vaktaálag verði endurskoðað og samræmt kjarasamningum á opinberum vinnumarkaði.

• lágmarksbónus verði tryggður í fiskvinnslu.

• skilgreind verði ný starfsheiti í launatöflu.

„Kröfurnar mótuðust á fundum í verkalýðsfélögum og á vinnustöðum um land allt og með hliðsjón af niðurstöðu viðhorfskannana. Þær urðu þannig til í víðtæku, lýðræðislegu ferli í verkalýðshreyfingunni þar sem öllum félagsmönnum gafst kostur á að koma sjónarmiðum sínum á framfæri og hafa áhrif,“ segir í tilkynningu.

Þá segir að grundvallaratriði sé að fólk lifi af dagvinnulaunum í stað þess að ganga sér til húðar í yfirvinnu, aukavinnu og akkorði til að framfleyta sér og sínum. „Langur vinnudagur og mikið álag dregur úr framleiðni og eykur samfélagslegan kostnað. Þá á launafólk að njóta þess í launum þegar það öðlast meiri færni í starfi með reynslu og menntun.“

• 4 blogg um fréttina

Bloggað um fréttina

• Guðmundur Ásgeirsson: Dugar ekki fyrir lágmarksframfærslu
• sleggjuhvellur: Hærri lágmarkslaun = meiri atvinnuleysi
• Ómar Ragnarsson: 100 þúsund krónur árið 1977.
• Þorsteinn Siglaugsson: Erfitt við að eiga