Berjast um atkvæði stúdenta

Kosningar til stúdentaráðs Háskóla Íslands hófust í morgun. Að þessu sinni berjast tvær fylkingar um atkvæði nemenda skólans og kjósa nemendur hvers fræðisviðs sviðsráð með því að velja á milli frambjóðenda viðkomandi sviðs. Kosningarnar eru rafrænar og fara fram í gegnum innri vef skólans.

Vaka, félag lýðræðissinnaðra stúdenta, er í meirihluta í Stúdentaráði með 19 fulltrúa af 27 en Röskva, samtök félagshyggjufólks við Háskóla Íslands er með átta fulltrúa. Í fyrra var kjörsókn 40,67% en árið 2013 var kjörsókn 35,1%.

mbl.is heyrði hljóðið í formönnum fylkinganna tveggja. Niðurstöður kosninganna liggja fyrir annað kvöld.

Háskólinn aftarlega á merinni

 „Hljóðið er gott í okkur, hér eru allir frambjóðendur á fullu við að koma málefnum okkar á framfæri. Við erum mjög ánægð með að kjörsókn hafi aukist síðustu ár, það er gott að hafa þetta rafrænt á Uglunni,“ segir Jón Birgir Eiríksson, formaður Vöku, í samtali við mbl.is. „Við höfum reynt að koma á framfæri því góða starfi sem við höfum sinnt þetta árið ásamt því að setja fram nýja hluti sem koma fram eftir liðið ár.“

Jón Birgir segir félagið aðallega hafa unnið með kennslumál síðastliðið ár. „Háskólinn virðist standa aftarlega á merinni hvað það varðar. Við höfum beitt okkur fyrir því að innleiða nútímalegri kennsluhætti, til dæmi með aukinni vendikennslu þannig að fyrirlestrar eru til dæmis settir á Ugluna, innri vef skólans. Svo eru það þessi stóru mál, lánasjóðurinn og húsnæðismálin,“ útskýrir hann og nefndi að fyrir jól var samþykkt að byggja stúdentaíbúðir í Brautarholti í Reykjavík en þær verða byggðar á næstu fimm árum.

Staðsetja sig ekki á pólitíska litrófinu

mbl.is ræddi við Arnór Bjarka Svarfdal fyrr í vikunni en hann var fenginn til að stýra Hanaslagnum, kappræðum á milli fylkinganna tveggja. Sagði hann meðal annars að fylkingarnar væru ekki á öndverðum meiði með neitt en oft hefur því verið haldið fram að afar lítill munur sé á baráttumálum Röskvu og Vöku.

Jón Birgir segist ekki vera sammála Arnóri Bjarka að öllu leyti. „Þetta er eins og í stjórnmálum almennt, þar berst þú fyrir hagsmunum ákveðins hóps. Það er hægt að líkja Vöku við stéttarfélag, við hugsum um stúdenta, eins breiðan hóp og við mögulega getum og reynum að komast inn í alla króka og kima háskólans til að sinna því starfi. Svo er þetta ekki ósvipað landspólitíkinni almennt, þar eru allir að flokkar að vinna að því sama, að öllum líði sem best rétt eins og fylkingar tvær í háskólanum gera.“

„Við reynum að vera praktískari, erum minna fyrir mótmæli og reynum frekar að ganga beint til verks. Vaka er í raun opin öllum, við staðsetjum okkur ekki á pólitíska litrófinu,“ segir Jón Birgir að lokum.

Æskilegt að hafa meira umboð

„Við erum mjög jákvæð og ánægð með afrakstur okkar síðastliðið ár sem minnihluta. Þó að við séum bara níu í stúdentaráði höfum við verið mjög dugleg að láta í okkur heyra, bæði innan Stúdentaráðs og utan skólans, bæði sem einstaklingar og fylking í heild. Við erum mjög spennt fyrir úrslitunum á morgun en vitum samt að þetta er ekki búið fyrr en þetta er búið,“ segir Ragna Sigurðardóttir, formaður Röskvu, í samtali við mbl.is.

„Það skiptir mjög miklu máli að ná góðri kjörsókn. Við viljum endilega að það verði enn betri kjörsókn í ár. Við vitum að kosningaþátttaka hjá okkar kynslóð er ekki alveg nógu góð og það byrjar helst í stúdentapólitík. Ef við ætlum einhversstaðar að hafa áhrif þá er það hér.“

Fylkingin hefur verið í minnihluta í fimm ár, eða frá árinu 2009 en vonast til að bæta við sig fulltrúum í ár. „Ég hugsa að við höfum reynt að vera svolítið sýnilegri og virk yfir allt árið, þetta snýst ekki bara um kosningabaráttu, þetta snýst líka um að gæta hagsmuna stúdenta. Maður er ekki valdlaus þó maður sé ekki í meirihluta. Auðvitað er æskilegt að hafa meira umboð til að tjá sig um málefni stúdenta og vekja athygli á þeim,“ segir Ragna.

Mikilvægt að bjóða alla velkomna

Hún segir er sérstaklega mikilvægt að bjóða alla velkomna, sérstaklega erlenda nema. Í ár kom kosningablað Röskvu bæði út á íslensku og á ensku en fjöldi erlendra stúdenta er við nám við Háskóla Íslands.

„Í skólanum eru þúsundir erlendra nema sem tala ekki íslensku, þeir hafa atkvæðisrétt og við viljum að þeir geti tekið fullan þátt í stúdentapólitíkinni. Það væri æskilegt að fá fulltrúa þeirra í stúdentaráð. Þetta er byrjunarskref, eitthvað sem hefði átt að gerast fyrir löngu,“ segir Ragna.

„Okkar meginstefna er jafnrétti til náms, auðvitað á það líka við um nemendur sem eiga ekki íslensku að móðurmáli. Þetta er kannski eitthvað sem háskólinn þarf að móta sér stefnu í, að vera jafn aðgengilegur erlendum nemendum og íslenskum.“

Ragna er sammála Arnóri Bjarka um að ekki sé mikill munur á fylkingunum tveimur og segir það að einhverju leyti mjög jákvætt.

„Við vinnum saman allt árið, sviðsráðin starfa mjög náið saman. Við verðum að gera unnið vel saman til að koma að málefnum stúdenta og gera eitthvað en við verðum líka að hafa eitthvað aðhald. Það er það sem Röskva hefur verið að gera undanfarið ár, meðal annars að gagnrýna skipun fulltrúa á skrifstofu Stúdentaráðs, skipan launaðra fulltrúa í stúdentaráði og jafnvel vinnubrögð meirihlutans. Við höldum að það sé eitthvað sem hafi bætt Stúdentaráð,“ segir Ragna að lokum.