Innlent | mbl | 7.2.2015 | 12:15 | Uppfært 14:41

Frelsi hinna fáu til að maka krókinn

Það var vel mætt á fundinn í dag. mbl.is/Árni Sæberg

Katrín Jakobsdóttir, formaður Vinstrihreyfingarinnar – græns framboðs, sagði í máli sínu við upphaf flokksráðsfundar Vinstri grænna, sem haldinn er í Iðnó í Reykjavík, mikilvægt að flokkurinn taki upp á sína arma hugtök sem „hafa of lengi verið í gíslingu hægri aflanna.“ Nefndi hún þar hugtökin frelsi, stöðugleika og öryggi.

„Frelsið sem hefur verið í einkaeign Sjálfstæðisflokksins um langt skeið. Flokksins sem einnig talaði um stétt með stétt og ætlaði að vinna fyrir háa jafnt sem lága. Sjálfstæðisflokknum tókst svo vel að eigna sér frelsisorðið að margar aðrar stjórnmálahreyfinga veiguðu sér við að tala um það,“ sagði Katrín og bætti við að frelsi Sjálfstæðisflokksins hafi hins vegar þróast út í að vera aðeins frelsi hinna fáu og efnamiklu til að „maka krókinn, iðulega með sérstakri ríkisaðstoð á kostnað frelsis fjöldans.“

Sagði hún frelsi fólks til að sækja sér menntunar og heilbrigðisþjónustu við hæfi hins vegar gleymast. Sömu sögu er að segja um frelsi fólks til að búa í samfélagi þar sem dagvinnulaun duga fyrir mannsæmandi lífi.

„Þegar skorið er niður þannig að þjónusta við almenning rýrnar, aðgangur eldri en 25 ára að framhaldsskólamenntun er skorinn niður, gjöld fyrir læknisþjónustu eru hækkuð, fjárfestingar í rannsóknum og nýsköpun eru skornar niður, þannig að framtíðartækifærum í landinu okkar fækkar, þá er verið að skerða frelsi fjöldans til að lifa góðu lífi,“ sagði Katrín og bætti við að Vinstri græn ættu að taka hugmyndina um frelsi fjöldans og gera það að sínu.

Vék Katrín sér því næst að stöðugleika. Velti hún upp þeirri spurningu hvort stöðugleiki snerist einungis um að þeir sem eru efnameiri auki hlut sinn enn frekar. „Þannig er staðan á Íslandi. Ríkustu 10 prósentin eiga 70 prósent alls auðs. […] En snýst skattastefna núverandi stjórnvalda ekki einmitt um að halda því ástandi stöðugu?"

Öryggi er fjölþætt hugtak

Þá sagði Katrín einnig mikilvægt að endurskoða hugtakið öryggi. Í stað þess að tengja það einvörðungu við hugsanleg vopnakaup lögreglunnar hlyti hugmyndin um öryggi að snúast um að byggja upp friðsamt jafnaðarsamfélag.

„Þar sem fólk getur lifað mannsæmandi lífi með aðgengi að menntun og heilbrigðisþjónustu og öðrum mikilvægum þáttum. Eða þak yfir höfuðið, sem er það sem unga kynslóðin sér ekki fram á núna. Öryggi hefur nefnilega ekkert með skotvopn eða forvirkar rannsóknarheimildir að gera, sem enn og aftur hefur skotið upp kollinum hjá hæstvirtum innanríkisráðherra,“ sagði hún.

VG stimplaði „sem á móti“