Innlent | mbl | 8.2.2015 | 16:17 | Uppfært 22:08

Aurskriða lokar vegi í Kollafirði

Vindur í lofti er enn að vaxa norðanlands. Mynd úr safni. Ljósmynd/Einar Guðberg Gunnarsson

Vindur í lofti er enn að vaxa norðanlands og verður í hámarki á milli kl. 18 og 22. Mjög hvasst víða á fjallvegum og sviptivindar á láglendi þar sem hviðurnar geta orðið allt að 35-45 m/s á Snæfellsnesi, á Vestfjörðum og á Norðurlandi. 45-55 m/s snemma í kvöld á utanverðum Tröllaskaga og við vestanverðan Eyjafjörð.

Einnig í Skagafirði frá Varmahlíð á Sauðárkrók sem og í Ljósvatnsskarði og Kinn. Þá er líka spáð byljóttum vindi fram á nótt suðaustanlands, einkum við Hornafjörð og Hvalnes.

Aurskriða lokar veginum við Klett í Kollafirði í Austur-Barðastrandarsýslu en unnið er að hreinsun og vonast er til að vegurinn opnist fljótlega.

Vegfarendur eru varaðir við miklum vatnavöxtum í dag, vatn getur farið yfir veg þar sem ræsi hafa ekki undan.

Færð og aðstæður

Vegir á Suður- og Vesturlandi eru að mestu greiðfærir þó er eitthvað um hálku eða hálkubletti í uppsveitum Suðurlands. Óveður er á norðanverðu Snæfellsnesi, Bröttubrekku og á Laxárdalsheiði.

Það er eitthvað um hálkubletti á Vestfjörðum, óveður er á flestum fjallvegum og á Súðavíkurhlíð.

Vegir eru víða greiðfærir á Norðurlandi en þó er eitthvað um hálkubletti. Óveður er á Siglufjarðarvegi, Öxnadalsheiði og á Mývatns- og Möðrudalsöræfum.

Á Austurlandi eru hálkublettir nokkuð víða en greiðfært að mestu á Héraði, Fagradal og Oddsskarði. Greiðfært er að mestu með suðausturströndinni en óveður á Hvalnesi.

Undanfarna daga hefur hópur af hreindýrum verið við veg á milli Reyðarfjarðar og Eskifjarðar og eru vegfarendur beðnir að sýna aðgát.

Vegna óvenjumikils jarðsigs á Siglufjarðarvegi eru vegfarendur beðnir að gæta ýtrustu varúðar.

Uppfært kl. 18.22

Búið er að opna veginn við Klett í Kollafirði í Austur-Barðastrandarsýslu.