Varðskipið Týr er á leið til hafnar á Ítalíu með 284 flóttamenn um borð sem bjargað var á hafi í gær og í nótt. Ekki liggur nákvæmlega fyrir hvar Týr kemur að landi á þessari stundu, samkvæmt upplýsingum frá Landhelgisgæslunni.

Varðskipið Týr tók í gær þátt í björgunaraðgerðum djúpt norður af Líbíu.  Áhöfn varðskipsins bjargaði í gærdag 75 manns af litlum gúmmíbát og gengu björgunaraðgerðir mjög vel. Um borð voru karlmenn og nokkur börn.

Varðskipið Týr hélt svo rakleiðis að öðrum litlum bát sem sendi frá sér neyðarkall þar sem  tæplega 100 flóttamönnum var bjargað um borð í varðskipið.  

<span>Í nótt var síðan enn fleiri flóttamönnum bjargað um borð í varðskipið þannig að alls eru 284 flóttamenn um borð í Tý.</span>

Síðustu daga hefur fjölda fólks verið bjargað á þessu svæði og svo virðist sem mikið flæði flóttafólks sé nú frá Líbíu áleiðis til Ítalíu.  

Varðskipið Týr verður áfram við björgunarstörf á þessu svæði á næstunni.