Innlent | mbl | 19.2.2015 | 16:53

Leifur fær endurgreitt frá ríkinu

Karl Sigurbjörnsson, fyrrverandi biskup Íslands, vígði hurðina við hátíðlega athöfn árið 2010. mbl.is/Ómar

Hæstiréttur hefur staðfest niðurstöðu Héraðsdóms Reykjavíkur sem komst að þeirri niðurstöðu að íslenska ríkinu beri að Breiðfjörð 7,5 milljónir króna í greiddan virðisaukaskatt og álag vegna hurðanna sem prýða Hallgrímskirkju. Um listaverk sé að ræða en ekki smíðavöru til bygginga.

Söfnuður Hallgrímskirkju hóf fyrir 25 árum að afla fjár fyrir kaupum á listaverki sem nota átti meðal annars sem hurð í kirkjunni. Leitað var til Leifs um gerð listaverksins og tók hann að sér verkið. Um er ræða skúlptúr listaverk sem er hluti af heildstæðu 14 metra listaverki stefnanda á vesturhlið Hallgrímskirkju og samanstendur af lágmynd úr bronsi, tveimur hlutum úr bronsi með myndverki á ytri og innri hlið sem mynda hurð og steindum glugga sem gerður var árið 1999 og settur upp það ár. Hurðin með myndverkinu, lágmyndin og steindi glugginn mynda eina heild.

Leifur flutti í janúar 2010 til landsins frá Þýskalandi þá hluta verks síns sem samanstendur af lágmynd úr bronsi og tveimur hlutum verksins sem mynda bronshurð kirkjunnar. Á tollskýrslu kom fram að um listaverk úr bronsi væri að ræða sem félli undir frumverk af höggmyndum og myndastyttum úr hvers konar efni.

Í kjölfarið sendi fulltrúi tollstjóra Leifi tölvupóst þar sem fram kom að tollstjóri hafnaði að afgreiða listaverkið undir tollskrárnúmerinu þar sem embættið teldi listaverkið falla undir annað tollskrárnúmerið, þ.e. smíðavörur til bygginga. Þann 26. janúar 2010 var gerð ný tollskýrsla og greiddi Leifur sama dag virðisaukaskatt með 25% álagi af umræddri sendingu, samtals að fjárhæð kr. 7.471.900, með fyrirvara um endurgreiðslu.

Leifur höfðaði síðan mál gegn íslenska ríkinu og krafðist þess að úrskurður tollstjóra yrði ógiltur og að ríkið dæmt til að endurgreiða Leifi að fullu greiddan virðisaukaskatt og álag.

Bæði héraðsdómur og Hæstiréttur féllust á aðalkröfu Leifs og er ríkinu gert að endurgreiða Leifi til baka. Ríkið þarf jafnframt að greiða Leifi 900.000 krónur í málskostnað fyrir Hæstarétti.