Innlent | mbl | 20.2.2015 | 11:12 | Uppfært 9.3.2015 14:19

Skemmtiferðaskip koma vegna sólmyrkva

Alls munu á fjórða þúsund farþegar koma með skemmtiferðaskipunum fjórum til Íslands í mars. Magellan er stærst skipanna fjögurra, alls 46 þúsund tonn að stærð og tekur alls 1250 farþega. mbl.is

Fjögur skemmtiferðaskip, með á fjórða þúsund farþega, munu koma hingað til lands sérstaklega vegna sólmyrkvans 20. mars næstkomandi og norðurljósanna. Þetta er í fyrsta skipti sem lystiskip koma til Íslands um vetur og gæti markað upphafið að vetrarsiglingum skemmtiferðaskipa.

„Þetta er skemmtileg nýbreytni varðandi skemmtiferðasiglingar til Íslands. Það hefur ekki gerst áður að skemmtiferðaskip komi hingað um vetur. Um er að ræða ellefu daga siglingu skipanna á norðurslóðir til að sjá sólmyrkvann og norðurljósin. Öll skipin munu koma til hafnar í Reykjavík. Ef þetta gengur vel gæti þetta orðið upphafið af vetrarsiglingum skemmtiferðaskipa til Íslands,” segir Jóhann Bogason, verkefnisstjóri hjá TVG-Zimsen, í tilkynningu, en fyrirtækið þjónustar flest skemmtiferðaskip sem hingað til lands koma.

Frétt mbl.is: Myrkvinn sá mesti í sextíu ár

Þetta eru skipin Magellan, Marco Polo, Azores og Voyager og er ætlunin að þau verði hér við land þegar næsti sólmyrkvi verður hinn 20. mars. Sólmyrkvinn er almyrkvi og ferill hans liggur aðeins um 70-100 km austan við Ísland að sögn stjörnufræðinga. Öll skemmtiferðaskipin eru mjög glæsileg en Magellan er þeirra stærst, alls 46 þúsund tonn að stærð og tekur alls 1.250 farþega. Uppselt er í siglingarnar með skipunum fjórum samkvæmt upplýsingum frá útgerðum þeirra.

„Við finnum það hjá erlendum skipaútgerðum að áhugi ferðamanna á siglingum hingað eykst ár frá ári og þar horfa menn á að Ísland sé í lykilhlutverki á norðurslóðum. Sólmyrkvinn í mars er spennandi og norðurljósin hafa gríðarlegt aðdráttarafl. Þetta býður augljóslega upp á ný og mikilvæg tækifæri fyrir okkur Íslendinga. Það eru klárlega mjög spennandi tímar framundan í þessum geira. Skemmtiferðaskipin eru mjög mikilvægur þáttur í ört stækkandi ferðaþjónustugeiranum sem var stærsta útflutningsafurð Íslendinga undanfarin tvö ár,“ segir Jóhann ennfremur.