Innlent | mbl | 6.3.2015 | 11:56 | Uppfært 13:05

Krefst ekki refsingar í málinu

mbl.is/Hjörtur

Málskostnaður vegna LÖKE-málsins fellur á ríkið og ekki verður gerð krafa um refsingu í málinu af hálfu ákæruvaldsins. Þetta kom fram við aðalmeðferð málsins í morgun í Héraðsdómi Reykjavíkur að sögn Garðars St. Ólafssonar verjanda lögreglumanns sem ákærður er í málinu. Ákæruvaldið fer engu að síður fram á sakfellingu mannsins.

Þrír einstaklingar höfðu upphaflega stöðu grunaðra í málinu en það snerist um meintar ólögmætar uppflettingar á nöfnum tugua kvenna í málaskrárkerfi ríkislögreglustjóra. Fallið var frá málunum gegn tveimur þeirra, lögmanni og starfsmanni upplýsingatækifyrirtækis, síðasta sumar en lögreglumaðurinn ákærður. Í gær var hins vegar fallið frá fyrsta ákæruliðnum sem sneri að hinum meintu uppflettingum en annar ákæruliðurinn látinn halda sér en hann snýst um að lögreglumaðurinn hafi greint nánum vini frá því á samskiptavefnum Facebook að hann hafi verið skallaður sem tengdist lögreglumáli og er að mati saksóknara var brot á trúnaði.

Garðar segir að fyrsti málsliðurinn hafi verið tilkominn af annarlegum hvötum og nú hafi það verið upplýst. Ekki hafi verið staðið með eðlilegum hætti að rannsókn málsins hjá lögreglunni á Suðurnesjum. Hins vegar hafi embætti Ríkissaksóknara ekki haft þor til þess að falla alfarið frá málinu og „rassskella“ þar með lögregluna. Embættið vilji frekar að dómari sýkni í málinu. En með því að fara þess á leit við dómara að ríkið greiddi málskostnaðinn og engin krafa yrði gerð um refsingu í málinu væri í raun verið að viðurkenna sakleysi skjólstæðings hans.

Aðspurður segist Garðar eiga von á því að lögreglumaðurinn snúi aftur til starfa sama hvernig málið fari úr þessu þar sem ekki sé gerð krafa um refsingu. Menn hafi snúið aftur til starfa í lögreglunni eftir að hafa verið dæmdir til þess að greiða sektir en engin refsikrafa sé gerð í þessu tilfelli. Sjálfur fari hann fram á sýknun skjólstæðings síns enda hafi hann ekki gert neitt rangt.