Spá formannsslögum á víxl

Formannsslagur er framundan í Framsóknarflokknum að mati Össurar Skarphéðinssonar, þingmanns Samfylkingarinnar. Þar verði Sigmundur Davíð Gunnlaugsson, formaður flokksins og forsætisráðherra, hins vegar fjarri góðu gamni og slagurinn verða á milli Sigurðar Inga Jóhannssonar, varaformanns Framsóknarflokksins og sjávarútvegs- og landbúnaðarráðherr, annars vegar og Eyglóar Harðardóttur félags- og húsnæðismálaráðherra hins vegar.

„Sigmundur er forsætisráðherra sem upplifir sig í „bunker“ eða herkví. Líklega hefur aldrei setið jafn hörundssár forsætisráðherra og ósjálfrátt kemur saga H.C. Andersen um prinsessuna á bauninni upp í hugann,“ segir Össur meðal annars í pistli á Facebook-síðu sinni í dag og telur stöðu Sigmundar hafa veikst frá kosningasigrinum 2013. Karl Garðarsson, þingmaður Framsóknarflokksins, bregst við skrifum Össurar á vefsíðu sinni og setur fram eigin vangaveltur þess efnis að ólga sé innan Samfylkingarinnar og að lagt sé að Össuri að fara í formannsslag við Árna Pál Árnason, formann flokksins.

Hins vegar lýkur grein Karls á eftirfarandi orðum: „Aðeins eitt að lokum. Það er álíka mikið hæft í þessari grein og hugleiðingum Össarar Skarphéðinssonar um ólgu innan Framsóknarflokksins sem geti leitt til formannsskipta. Þessi grein er hugarburður minn, rétt eins og innantómt hjal Össurar.“

• 1 blogg um fréttina

Bloggað um fréttina

• Óðinn Þórisson: Össur skemmtilegur stjórnmálamaður