Þorsteinn Pálsson, fv. forsætisráðherra, segir ráðherra ekki geta breytt ákvörðunum Alþingis og það sé andstætt stjórnarskrá. Hann sakar Gunnar Braga Sveinsson, utanríkisráðherra, um gerræði þegar hann sendi ESB bréf um aðildarumsókn Íslands.

„Þegar Gunnar Bragi Sveinsson utanríkisráðherra tilkynnir aðildarríkjum Evrópusambandsins í gær með formlegum hætti að hann hafi einn og sér í krafti ráðherravalds síns ógilt ákvörðun Alþingis Íslendinga um aðildarumsóknina er það gerræði. Um leið er hann að auglýsa á vettvangi þjóðanna hvernig hann lítilsvirðir löggjafarsamkomu þjóðar sinnar,“ skrifar Þorsteinn í pistli á vefsíðuna Hringbraut.

Öllu máli skipti eftir þennan atburð að þjóðin taki höndum saman um að endurheimta ályktunarvald Alþingis. Hvort sem menn séu hlynntir aðildarviðræðunum eða andvígir þeim geti allir lýðræðissinnar sameinast um að brjóta valdbeitingu utanríkisráðherrans á bak aftur og færa málið inn á Alþingi. 

„Vilji ríkisstjórn með ríflegan meirihluta breyta fyrri ákvörðun Alþings getur hún gert það með því að leggja fram tillögu þar að lútandi á þeim sama vettvangi. Þannig eru leikreglur lýðræðisins. En ráðherra getur ekki svipt Alþingi því ályktunarvaldinu með einu bréfi,“ skrifar Þorsteinn.

Þá vitnar hann til skrifa Eyjunnar sem gerði að því skóna að forseti Íslands hafi lagt á ráðin um þessa aðför að Alþingi. Þorsteinn telur mikilvægt að forsetinn geri hreint fyrir sínum dyrum.

Pistill Þorsteins Pálssonar á vefsíðunni Hringbraut

Gunnar Bragi Sveinsson, utanríkisráðherra.

Tengdar fréttir

Ísland og ESB

Óttast einangrun og hóta neitunarvaldi

• Vilja endurupptöku á viðræðum um aðild að ESB
• Sekta ekki skip sem uppfylla ekki kröfur
• Hitnar í kolum vegna fiskveiði
• ESB gerir athugasemd við fetaost frá MS

» Fleiri tengdar fréttir

• 1 blogg um fréttina

Bloggað um fréttina

• Benedikt V. Warén: Var það þá ölæði........