Fá ekki gögn um uppljóstrara
Setja bókamerki
Hæstiréttur hefur hafnað kröfu Lárusar Welding, fyrrverandi forstjóra Glitnis, og Jóhannesar Baldurssonar, fyrrverandi framkvæmdastjóra markaðsviðskipta hjá Glitni, en þeir eru báðir sakborningar í Stím-málinu svokallaða.
Lárus krafðist dómkvaðningu matsmanna en Jóhannes krafðist þess að sér yrði afhent nánar tilgreind skjöl. Krafa hans laut í fyrsta lagi að afhendingu tiltekins hluta bréfs sem sérstakur saksóknari sendi ríkissaksóknara í febrúarmánuði í fyrra þar sem þess var óskað að Magnús Pálmi Örnólfsson, fyrrverandi forstöðumaður gjaldeyrismiðlunar Glitnis, fengi réttarvernd í Stím-málinu.
Í öðru lagi að tveimur nafngreindum yfirlögregluþjónum hjá sérstökum saksóknara yrðu gert að afhenda sér gögn um samskipti þeirra við aðra starfsmenn embættisins, Magnús Pálma og lögmann hans fram til febrúar í fyrra. Lögregluþjónarnir yfirheyrðu Magnús Pálma þrisvar sinnum.
Og í þriðja lagi krafðist Jóhannes þess að Glitni yrði gert að afhenda sér pósthólf og önnur gögn um Magnús Pálma og fleiri samstarfsmenn hans hjá bankanum.
Öllum þessum kröfum Jóhannesar var hafnað. Hæstiréttur benti meðal annars á í dómi sínum að á meðal gagna Magnúsar og annarra fyrrum starfsmanna Glitnis væru í ríkum mæli upplýsingar um fjárhagsmálefni fjölmargra viðskiptamanna Glitnis sem leynd yrði að ríkja um. Þá væru einnig um að ræða persónulegar orðsendingar, sem starfsmenn félagsins fengu eða sendu og vörðuðu einkalíf þeirra. En Jóhannes krafðist þess meðal annars að sér yrðu afhent dagbókar- og verkefnafærslur, vistuð MSN-samskipti og hljóðrituð borðsímtöl.
Enn er beðið þess að þinghald geti hafist í málinu og frestur verði gefinn til að skila inn greinargerðum. Rúmt ár er liðið frá því að ákærur í málinu voru gefnar út. Þeir Lárus og Jóhannes eru ákærðir ásamt Þorvaldi Lúðvík Sigurjónsson, fyrrverandi forstjóra Saga Capital, fyrir umboðssvik og hlutdeild í umboðssvikum þegar Glitnir lánaði félaginu Stím tugi milljarða króna.
Fundurinn hófst með söng: „Við stöndum þétt saman“
Evrópumál voru ekki til umræðu
Á þriðja hundrað strikuðu yfir eða færðu Þórð
Fljúga með dróna yfir Ölfusá í dag
Halla og Kristrún funda á Bessastöðum í dag
„Það er verið að kalla eftir okkur“
Voru með 5 sjúkrabíla í verkefnum á brautinni
