Innlent | mbl | 22.4.2015 | 20:48 | Uppfært 21:37

„Nokkuð fyrirsjáanleg niðurstaða“

Frá dómuppkvaðningu í Aurum-málinu síðasta sumar. mbl.is/Þórður

„Mér sýndist þetta vera nokkuð fyrirsjáanleg niðurstaða. Það er samt náttúrlega aldrei gott þegar að meðferð mála dregst á langinn af svona ástæðu,“ segir Ólafur Þór Hauksson, sérstakur saksóknari, en sýknudómur yfir fyrrverandi stjórnendum og eigendum Glitnis í Aurum-málinu svonefnda var ómerktur í Hæstarétti í dag.

Féllst rétturinn á að meðdómandi í Héraðsdómi Reykjavíkur hafi verið vanhæfur vegna tengsla við sakborning í Al Thani-málinu. Málið verður því í aftur tekið fyrir í héraðsdómi.

Á erfitt með að sætta sig við niðurstöðuna

Jón Ásgeir Jóhannesson, Lárus Welding, Bjarni Jóhannesson og Magnús Arnar Arngrímsson voru á síðasta ári sýknaðir í Héraðsdómi Reykjavíkur í málinu en saksóknari krafðist þess að Hæstiréttur ómerkti dóminn vegna vanhæfis meðdómanda. Meðdómandinn, Sverrir Ólafsson, er bróðir athafnamannsins Ólafs Ólafssonar sem var sakfelldur í Al Thani-málinu í mars. Gestur Jónsson, lögmaður Jóns Ásgeirs Jóhannessonar, lýsti yfir miklum vonbrigðum með niðurstöðuna.

„Ég á mjög erfitt með að sætta mig við hana. Það liggur alveg fyrir að meðdómandinn, sem er talinn vanhæfur, hafði fulla ástæðu til þess að líta svo á að sérstakur saksóknari færi með rangt mál þegar hann hélt því fram að hann hefði ekki vitað af bróðurtengslum meðdómandans við Ólaf Ólafsson,“ segir hann.

Segir málið vera einsdæmi

Í dómi Hæstaréttar kemur fram að ummæli Sverris í fjölmiðlum eftir að dómur héraðsdóms féll gæfu tilefni til að draga með réttu í efa að hann hefði verið óhlutdrægur í garð ákæruvaldsins fyrir uppkvaðningu héraðsdóms. Í þessu ljósi taldi Hæstiréttur að ómerkja yrði dóm Héraðsdóms Reykjavíkur ásamt meðferð málsins frá upphafi aðalmeðferðar. Vísaði hann því aftur til Héraðsdóms Reykjavíkur til meðferðar.

„Það liggur fyrir að reyndasti sakadómari landsins hefur gefið opinbera yfirlýsingu um að sérstakur saksóknari hafi hringt til hans og gert honum grein fyrir þessum bróðurtengslum og rætt við hann um þau. Niðurstaða sérstaks saksóknara hafi orðið sú, eftir þær samræður, að hann hafi fallist á að þetta væri ekki vanhæfa og að hann myndi ekki gera neinar athugasemdir við hæfi meðdómandans,“ segir Gestur.