Tölvukerfi Héraðsdóms Reykjavíkur er í einhverju ólagi sem tefur upphaf stóra markaðsmisnotkunarmáls Kaupþings í dag. Önnur vika aðalmeðferðar er að hefjast, en í síðustu viku voru tvö vitni yfirheyrð, sem einnig eru ákærð í málinu. Ef allt gengur samkvæmt áætlun má gera ráð fyrir að þrír einstaklingar verði yfirheyrðir í þessari viku.
Dómari kynnti fyrir viðstöddum að meðferð málsins yrði frestað um eina klukkustund til klukkan tíu, en þá verður athugað hvernig mál standa og hvort tölvukerfið sé komið í lag.
Samkvæmt upplýsingum frá dómara málsins er alveg sambandslaust við tölvukerfi dómstólsins þannig að ekki er hægt að tengjast neti, upptökukerfi eða málakerfi dómsins.