Innlent | Morgunblaðið | 7.5.2015 | 5:30

Neyðarástand á svínabúum

Formaður Svínaræktarfélags Íslands segir velferð dýranna stefnt í hættu vegna þrengsla sem hafa skapast á svínabúunum undanfarnar vikur í verkfalli dýralækna í BHM. mbl.is/Bjarni J. Eiríksson

Neyðarástand ríkir víða á svínabúum og velferð dýranna er stefnt í hættu að sögn Harðar Harðarsonar, formanns Svínaræktarfélags Íslands. Þrengslin eru mikil og svínabændur fá engar tekjur meðan ekki er slátrað vegna verkfalls dýralækna í BHM.

Í úttekt á ástandi einstakra svínabúa, sem unnin var í síðustu viku fyrir Matvælastofnun, kemur fram að þéttleiki og þrengsli í svínabúum séu víða orðin meiri en lög gera ráð fyrir og að ástandið fari versnandi, að því er fram kemur í umfjöllun um verkföllin og kjaraviðræðurnar í Morgunblaðinu í dag.

Þannig töldu eftirlitsaðilar við mat á heilbrigði og velferð svína á búi að Melum í Hvalfjarðarsveit, sem rekið er af Stjörnugrís, að þrengsl væru orðin of mikil. Þar eru núna um 2.900 gripir sem eru yfir 175 daga gamlir og yfir 110 kg að meðaltali.