Taka mun einhvern tíma að fjarlægja Ísland af öllum vefsíðum Evrópusambandsins þar sem fjallað er um umsóknarríki að sambandinu.

Þetta segir Klemens Ólafur Þrastarson, upplýsingafulltrúi sendinefndar Evrópusambandsins á Íslandi, í samtali við mbl.is en framkvæmdastjórn ESB tók á dögunum ákvörðun um að verða við óskum ríkisstjórnarinnar um að taka Ísland af lista yfir umsóknarríki. Klemens segir að það verði hins vegar smám saman gert. Evrópusambandinu sé full alvara í að verða við ósk ríkisstjórnarinnar.

Eins og mbl.is greindi frá fyrir helgi hafði Ísland verið tekið af lista yfir umsóknarríki á vefsíðu stækkunardeildar framkvæmdastjórnar Evrópusambandsins. Hins vegar var fjallað um það yfir helgina að á ýmsum öðrum vefsíðum sambandsins væri Ísland enn sagt umsóknarríki. Þannig greindi fréttavefurinn Nútíminn frá því að þetta ætti við um vefsíðu Evrópusambandsins yfir ríki þess og ríki sem væru á leið í sambandið. Þeirri vefsíðu hefur hins vegar verið breytt síðan og er Ísland ekki lengur að finna á þeirri vefsíðu.

„Það er einfaldlega verið að tína þetta út smám saman,“ segir Klemens. Sú vinna haldi áfram á næstu dögum. Það gæti þó mögulega gerst að eftir einhverjar vikur mætti enn finna einhverjar vísanir í Ísland sem umsóknarríki á einhverjum vefsíðum á vegum Evrópusambandsins en skýringin á því væri þá sú að þær síður hafi gleymst. „En það hefur enga merkingu ef það gerist. Þá verður það bara leiðrétt.“

Frétt mbl.is: Ísland af lista yfir umsóknarríki

Tengdar fréttir

Ísland og ESB

Óttast einangrun og hóta neitunarvaldi

• Vilja endurupptöku á viðræðum um aðild að ESB
• Sekta ekki skip sem uppfylla ekki kröfur
• Hitnar í kolum vegna fiskveiði
• ESB gerir athugasemd við fetaost frá MS

» Fleiri tengdar fréttir

• 2 blogg um fréttina

Bloggað um fréttina

• Guðmundur Ásgeirsson: Ísland af lista umsóknarríkja (aftur)
• Páll Vilhjálmsson: ESB-umsóknin: samkeppni um merkingarleysi