Reisa skilti um stríðsminjar

Í sumar verða sett upp fræðsluskilti í Öskjuhlíð í Reykjavík sem fjalla um stríðsminjar með áherslu á minjar sem tengjast flugsögunni. Menningar- og ferðamálaráð Reykjavíkurborgar samþykkti verkefnið einróma í vikunni.

Verkefnið er unnið af starfshópi um menningarmerkingar sem vinnur í samvinnu við Isavia. Tillagan að stríðsminjaskiltunum kom fram á samráðsvefnum Betri Reykjavík, þar sem íbúar geta lagt til hugmyndir að umbótum á borginni.

Helstu áhersluatriði skiltanna eru mörg; Reykjavíkurflugvöllur og saga hans, enda var hann upprunalega byggður af breska hernum, eldsneytistankarnir og gryfjan sem þeim fylgir, rafstöðin og ýmiss konar varnarviðbúnaður, t.d. vélbyssuvígi, koma við sögu.