Mikil orka er í mótmælendum á Austurvelli. Fjölmargir meðlimir BHM og félags íslenskra hjúkrunarfræðinga eru þar saman komnir en hjúkrunarfræðingar hafa sig enn sem komið er hvað mest í frammi.

Mótmælendur höfðu kyrjað „samningar“ hátt og lengi þegar þær fréttir bárust að þingfundi hefði verið frestað til hálf tvö. Þá þagnaði hópurinn í örskamma stund en fljótlega sleit hópur hjúkrunarfræðinga sig frá skaranum og gekk öruggum skrefum að Alþingishúsinu. Hópurinn hengdi skurðstofuhúfur og maska auk skilta á hurðina en mörg skiltanna vísa í mikinn spekileka úr stétt hjúkrunarfræðinga til Noregs. 

Uppátækið uppskar mikinn fögnuð meðal annarra mótmælenda og stóð hópurinn, alfarið skipaður konum í nokkra stund og kyrjaði „samningar“ fyrir utan dyrnar.

Áður en þær komu sér aftur fyrir í skaranum æpti ein, „Við gefumst aldrei upp“ og tók skarinn vel í þá staðhæfingu. Þrátt fyrir að á einu skilti við dyr Alþingis standi nú „Keep calm and heia Norge“ hafa mótmælendur engar áætlanir uppi um að slaka á fram að þingfundi.

Mótmælunum hefur hins vegar verið frestað til klukkan 13:30, þar sem þingfundi hefur verið frestað um jafnlangan tíma. Mótmælendur munu þá væntanlega snúa aftur á Austurvöll og láta í sér heyra.

Tengdar fréttir

Kjaraviðræður

Samið um 3,5% launahækkun

• Læknar samþykkja nýjan kjarasamning
• Virðing reyni að blekkja almenning og fjölmiðla
• Of snemmt að spá fyrir um hvort samningar náist
• Segja kjarasamninginn andstæðan lögum

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Noregur sem verkfallsvopn