„Það verða þung skref sem félagsmenn BHM stíga inn á vinnustaði sína hjá ríkinu eftir að hafa verið þvingaðir úr lögmætu verkfalli með lagasetningu Alþingis í gær,“ segir í fréttatilkynningu frá Bandalagi háskólamanna (BHM). Með samþykkt laga gegn verkfallsaðgerðum BHM hafi Alþingi afnumið samningsrétt félaga í bandalaginu sem sé skýrt brot á ákvæðum stjórnarskrárinnar og Mannréttindasáttmála Evrópu.

„Með lagasetningu setur ríkisvaldið lög á sjálft sig sem samningsaðila. BHM hefur hafið undirbúning málssóknar gegn ríkinu til þess að fá þessu mannréttindabroti hnekkt. Verkfallsaðgerðir félaga innan Bandalags háskólamanna höfðu staðið í tæpar 10  vikur í gær. Það er umhugsunarvert að ríkisvaldið gerði ekkert til þess að afstýra verkföllum. Í stað þess að ganga til samninga við BHM dró ríkið bandalagið fyrir dómstóla í því augnamiði að hnekkja verkfallsboðunum. Þeim kröfum hafnaði Félagsdómur með eftirminnilegum hætti. Á 24 samningafundum deiluaðila hjá Ríkissáttasemjara þokaðist samninganefnd ríkisins aldrei frá forskrift Samtaka atvinnulífsins,“ segir ennfremur.

Þá segir að efni 3. greinar laganna sé „lítið annað en ósvífin aðför að ríkisstarfsmönnum“ en þar ser kveðið á um að gerðardómur, sem fjalla á um kjaradeiluna takist ekki samningar fyrir 1. júlí, skuli horfa til kjarasamninga sem gerðir hafi verið eftir 1. maí. „Samkvæmt henni kannast ríkisvaldið hvorki við að hafa samið við lækna um tæplega 30% launahækkun til rúmlega tveggja ára né heldur við nýlegan samning sinn við framhaldsskólakennara. Ríkið hefur afhent Samtökum atvinnulífsins samningsumboð ríkisins við starfsfólk sitt.“

BHM segir það áhyggjuefni að ríkisvaldið „skuli hvorki skynja né skilja hlutverk sitt sem vinnuveitandi þúsunda háskólamenntaðra sérfræðinga sem sinna nauðsynlegri opinberri þjónustu í þjóðfélaginu. Án þeirrar þekkingar og þjónustu geta landsmenn ekki verið eins og dæmin sanna.“ Samninganefnd BHM hafi frá upphafi lagt sig fram við að skilgreina sameiginlega hagsmuni félagsmanna sinna og ríkisins af því að mæta sanngjörnum kröfum um að háskólamenntun yrði metin til launa.

„Að auki hefur BHM viljað tryggja virkni stofnanasamninga hjá ríkinu en í þeim eru kjör sérfræðinga hjá ríkinu ákvörðuð. Svo virðist sem ríkisvaldið sé með öllu áhugalaust um virkni þeirra samninga. Af því leiðir að launakerfi ríkisstarfsmanna er ekki á vetur setjandi.“

Tengdar fréttir

Kjaraviðræður

Boða verkföll í fjórum skólum til viðbótar

• Börn hafi engan rétt á leikskólakennslu
• „Það er bara góð vinna í gangi“
• Á algjöru frumstigi eftir þrjár vikur af verkfalli
• Ekki sátt með tilkynningu á vef KÍ

» Fleiri tengdar fréttir

• 1 blogg um fréttina

Bloggað um fréttina

• Óðinn Þórisson: Það mun enginn fara í mál við BHM