Breyta lögum um fasteignalán

Í frumvarpsdrögum að nýjum lögum um fasteignalán er lagt til að að Fjármálaeftirlitinu verði veitt heimild, innan ákveðins ramma, til að setja reglur um hámark veðsetningarhlutfalls fasteignalána til neytenda að fengnum tilmælum frá fjármálastöðugleikaráði.

Einnig er lagt til að hámarki uppgreiðslugjalds verði breytt til að stuðla að auknu framboði lána með föstum vöxtum. 

Fjármálaráðuneytið birti drögin í dag.

Fjármála- og efnahagsráðherra skipaði nefnd hinn 12. janúar 2014 sem falið var að semja frumvarp til nýrra laga um fasteignalán sem tæki mið af tilskipun Evrópuþingsins og ráðsins 2014/17/ESB um lánssamninga fyrir neytendur í tengslum við íbúðarhúsnæði.

Í september síðastliðnumgaf fjármála- og efnahagsráðuneytið út skýrslu um nýja umgjörð um veitingu fasteignalána til neytenda til til upplýsingar fyrir haghafa. Markmið skýrslunnar var að koma umræðu af stað um bestu framkvæmd við veitingu fasteignalána sem nýtast myndi við gerð nýrrar innlendrar umgjarðar þar um. Skýrslan fjallar meðal annars um inntak fasteignalánatilskipunarinnar, samspil hennar við endurskoðun annarrar löggjafar á sviði fjármálamarkaða og aðgerðir stjórnvalda er varða húsnæðismarkaðinn.

Nefndin hefur unnið drög að frumvarpi til nýrra laga um fasteignalán sem óskað er umsagna um. Gert er ráð fyrir að frumvarpið verði lagt fram á haustþingi og miðast gildistaka þess við 21. mars 2016. 

Helstu breytingar frá gildandi rétti eru þær að lagt er til að gerðar verði almennar kröfur um starfskjör starfsmanna lánveitenda og lánamiðlara og sértækar kröfur um starfskjör starfsfólks lánveitenda sem framkvæmda lánshæfis- og greiðslumat. 

Þá verði gerðar kröfur um hæfni og þekkingu starfsfólks lánveitenda og lánamiðlara og kveðið á um að óheimilt sé að binda samning um fasteignalán eða lánstilboð því skilyrði að neytandi geri samning um kaup á annarri aðgreindri fjármálaafurð eða fjármálaþjónustu.

Þá verður lögð aukin áhersla á þær útskýringar sem neytandi á rétt á fyrir lánveitingu.

Fjallað er sérstaklega um hvernig lánaráðgjöf skuli fara fram og skýrar skilið á milli lánaráðgjafar og lánveitingar en áður hefur verið gert.

Eins er gerð  krafa um að lánamiðlarar skrái sig hjá Fjármálaeftirlitinu áður en þeim er heimilt að veita þjónustu. Jafnframt er þeim gert skylt að eiga aðild að úrskurðarnefnd um viðskipti við fjármálafyrirtæki.

Ákveði lánveitanda að veita lán þrátt fyrir neikvætt greiðslumat skal hann útskýra þá ákvörðun fyrir neytanda og skjalfesta rökstuðning.

<a href="http://www.fjarmalaraduneyti.is/frettir/nr/19738">Frétt fjármálaráðuneytisins</a>

• 1 blogg um fréttina

Bloggað um fréttina

• Guðmundur Ásgeirsson: Frumvarp um innleiðingu óþýddrar tilskipunar