„Vegurinn“ til Eyja tepptur af ferðafólki

Fjölgun ferðamanna til Vestmannaeyja hefur verið svo mikil að undanförnu að nú er svo komið að eyjaskeggjar fá vart pláss í Herjólfi til og frá eyjunni.

Hafa farþegar í Herjólfi í júnímánuði aldrei verið fleiri og voru 48.781 í ár. Er það fjölgun um tæplega 2.000 farþega.

„Það gengur ekki að álagið á Herjólf sé orðið slíkt að heimamenn geti ekki notað skipið þegar á þarf að halda, þetta er vegurinn heim til okkar og frá okkur,“ segir Elliði Vignisson, bæjarstjóri í Vestmannaeyjum, og bendir á í umfjöllun um mál þetta í Morgunblaðinu í dag, að einfaldast væri að taka ákvörðun um að sigla skipinu fleiri ferðir á milli lands og Eyja.