Krefjast skýringa á hækkun matartolla

Félag atvinnurekenda hefur sent atvinnuvega- og nýsköpunarráðuneytinu erindi og farið fram á upplýsingar um nýlega hækkun á matartollum.

Í bréfi FA til ráðuneytisins er vísað er til auglýsingar atvinnuvega- og nýsköpunarráðuneytisins um WTO-tollkvóta, sem birt var á vef ráðuneytisins 27. maí síðastliðinn. Með samanburði við auglýsingar um WTO-kvótana sem birtust 9. maí 2014 sést að magntollar, sem lagðir eru á vörur sem flytja má inn á kvótunum, hækka um 7,1 til 7,5% á milli ára.

„Með vísan til upplýsingalaga og hagsmuna matvælainnflytjenda í Félagi atvinnurekenda er hér með farið fram á að ráðuneytið afhendi öll gögn og útreikninga sem liggja að baki þessari tollahækkun, þ.m.t. afrit af öllum inn- og útsendum erindum og upplýsingum sem aflað var,“ segir í bréfi FA. „Jafnframt er þess óskað að ráðuneytið rökstyðji ákvörðun sína til fulls og tilgreini á hvaða reglugerðar- og lagaákvæðum það byggi ákvörðun sína um hækkun tollanna, hvaða hagsmunir voru lagðir til grundvallar og með hvaða hætti hugað var að meðalhófi og hagsmunum neytenda.“

• 1 blogg um fréttina

Bloggað um fréttina

• Kristbjörn Árnason: Eru innflytjendur að missa spón úr aski sínum?