Neytendastofu bárust 7817 erindi

Enn er unnið að eftirfylgni með málum tengdum kostnaði sem fylgir lántöku hjá smálánafyrirtækjum, hjá Neytendastofu. Þetta er meðal þess sem kemur fram í ársskýrslu stofnunarinnar fyrir síðasta ár.

Smálánafyrirtækin höfðu það fyrir reglu að rukka lántakendur um aukagjald vildu þeir fá lánin afgreidd strax, það er samdægurs í stað átta daga. Neytendastofa bannaði innheimtu gjaldsins þar sem það leiddi til þess að árleg hlutfallsleg tala kostnaðar færi upp fyrir 50% hámarks samkvæmt lögum um neytendalán. 

Fyrirtækin kærðu ákvarðanir Neytendastofu til áfrýjunarnefndar neytendamála en hún staðfesti ákvarðanir Neytendastofu. 

90% neytenda vilja meiri áherslu á neytendavernd

Þetta er meðal þessara mála sem komu til kasta Neytendastofu en í skýrslunni er m.a. að finna niðurstöður úr þjóðmálakönnun Háskóla Íslands þar sem fram kemur að 94% neytenda vilja fá aðstoð Neytendastofu ef þeir eru ósáttir eða lenda í vandræðum í viðskiptum sínum við kaup og sölu á vörum eða þjónustu. Þar kemur einnig fram að 90% neytenda vilja meiri áherslu á neytendavernd.

Á árinu 2014 bárust 7817 erindi til Neytendastofu með símtölum, tölvupósti eða rafrænum ábendingum þar að auki um 1000 skrifleg erindi. Mikill fjöldi erinda varðandi neytendalán voru áberandi á árinu svo og mál er varða villandi eða blekkjandi viðskiptahætti. Neytendastofa hefur sent fjölmargar umsagnir til Alþingis til að tryggja að við setningu laga sé ávallt gætt að grunnreglum á sviði neytendaverndar. 

Ársskýrslan 

• Blogga um frétt