Ríkisskuldir minnka um 2,5%

Heildarskuldir ríkissjóðs minnka um 54 milljarða króna eftir uppkaup ríkissjóðs á eigin bréfum útgefnum í bandaríkjadölum, að því er fram kemur í áætlun Lánamála ríkisins.

Skuldirnar verða þá 63,8% af vergri landsframleiðslu og hafa lækkað um 2,5%. Eftir uppgreiðslu bréfanna verða þær 1.403 milljarðar króna. Áhrif hefur þó að spá Seðlabanka um verga landsframleiðslu árið 2015 virðist nokkuð rífleg.

Til samanburðar hafa skuldirnar minnkað um 309 milljarða frá maí 2012, þegar þær voru mestar, að því er fram kemur í umfjöllun um þetta mál í Morgunblaðinu í dag.