Innlent | mbl | 19.9.2015 | 21:35

Tillagan verði dregin til baka

Halldór Halldórsson oddviti Sjálfstæðisflokksins í Reykjavík. mbl.is/Ómar

Borgarfulltrúar Sjálfstæðisflokksins og Framsóknar og flugvallarvina hafa óskað eftir því að aukafundur fari fram í borgarstjórn Reykjavíkur í síðasta lagi þriðjudaginn 22. september þar sem tekin verði fyrir tillaga þeirra um að draga til baka samþykkt borgarstjórnar á dögunum um undirbúning og útfærslu á sniðgöngu borgarinnar á ísraelskum vörum.

Fram kemur meðal annars í fréttatilkynningu að beðnin sé lögð fram í þeim tilgangi „að draga úr þeim skaða sem samþykkt borgarstjórnar hefur í för með sér fyrir viðskipti Íslands við önnur lönd.“ Greinargerð með tillögunni er farið yfir þau viðbrögð sem málið hefur kallað á og lýkur henni á þessum orðum: „Samþykkt meirihluta borgarstjórnar var því vanhugsuð og hefur þegar haft í för með sér afleiðingar til skaða fyrir íslenska þjóð.“

Greinargerðin í heild:

„Tillaga þessi er lögð fram til að lágmarka þann skaða sem samþykkt meirihluta borgarstjórnar hefur haft í för með sér fyrir orðspor og viðskipti Íslands við önnur lönd. Þann 15. september 2015 ákvað meirihluti borgarstjórnar Reykjavíkur að fela skrifstofu borgarstjóra í samvinnu við innkaupadeild Reykjavíkurborgar að undirbúa og útfæra sniðgöngu Reykjavíkurborgar á ísraelskum vörum meðan hernám Ísraelsríkis á landsvæði Palestínumanna varir, eins og það er orðað í samþykkt borgarstjórnar.

Utanríkisráðuneytinu, sendiskrifstofum Íslands erlendis og Íslandsstofu hefur af þessu tilefni borist verulegur fjöldi fyrirspurna um afstöðu stjórnvalda til samþykktar borgarstjórnar. Þá hafa ferðaþjónustuaðilar lýst yfir áhyggjum sínum vegna málsins og þegar hefur orðið vart við afpantanir ferða.

Sveitarstjórnir eru eins og önnur stjórnvöld bundin af lögum. Í því felst að Reykjavíkurborg verður að haga stjórnsýslu sinni í samræmi lög og að ákvarðanir hennar mega ekki fara í bága við þau, þ. á m. lög um opinber innkaup, þar sem óheimilt er að mismuna fyrirtækjum á grundvelli þjóðernis eða af öðrum sambærilegum ástæðum.

Samþykki Reykjavíkurborg að breyta innkaupastefnu sinni með bindandi hætti þannig að ísraelskir birgjar skuli sniðgengnir, samræmist það hvorki íslenskum lögum né ákvæðum í alþjóðlegum skuldbindingum alþjóðaviðskiptastofnunarinnar (WTO) um opinber innkaup, sem Ísland er aðili að og Reykjavíkurborg og önnur sveitafélög eru bundin af.

Utanríkisráðuneytið áréttar að ákvörðun borgarstjórnar Reykjavíkur er ekki í samræmi við utanríkisstefnu Íslands og er heldur ekki til marks um tengsl Íslands og Ísraels. Samþykkt meirihluta borgarstjórnar var því vanhugsuð og hefur þegar haft í för með sér afleiðingar til skaða fyrir íslenska þjóð.“