Aðlögunarfrestur svínabænda liðinn

Frestur svínabænda til að óska eftir aðlögunartíma til að uppfylla kröfur nýrrar reglugerðar, um velferð svína sem lúta að húsakosti og hreyfingu, hvíld og þörfum dýranna, rann út í gær, en ný reglugerð um velferð svína hefur það að markmiði að bæta velferð svína að því er segir í fréttatilkynningu frá Matvælastofnun.

„Svínaframleiðendur höfðu kost á að sækja um frest til aðlögunar að skilyrðum 7. og 15. gr. reglugerðarinnar til 1. október 2015, ef aðstæður eru þannig að kostnaðarsamt er fyrir viðkomandi framleiðanda að uppfylla kröfur reglugerðarinnar. Reglugerðin tilgreinir að frestir eru háðir því að framleiðandi skili inn tímasettri úrbótaáætlun og kostnaðarmati. Einnig er Matvælastofnun óheimilt eftir 1. janúar 2016 að veita undanþágu til notkunar á básum sem varanlegum vistarverum gyltna nema básarnir séu þannig að gyltan geti lagst, legið og rétt úr sér liggjandi án átroðnings frá gyltum í næstu básum,“ segir ennfremur.

Fjöldi umsókna hafa borist um frest til aðlögunar ásamt úrbótaáætlunum. „Matvælastofnun mun leggja mat á þær úrbótaáætlanir sem lagðar hafa verið fram m.t.t. skilyrða stofnunarinnar. Ef stofnunin telur úrbótaáætlanir fullnægjandi og að önnur skilyrði til veitingar undanþágu séu uppfyllt mun Matvælastofnun veita fresti til aðlögunar. Lengd fresta verður metin út frá aðstæðum á hverju búi fyrir sig, en Matvælastofnun skal skv. reglugerðinni ekki veita lengri fresti en til 1. janúar 2025.“

• 2 blogg um fréttina

Bloggað um fréttina

• Axel Jóhann Axelsson: Matvælastofnun hefur vald til að leyfa dýraníð í allt að …
• Kristbjörn Árnason: Nú standa fyrirmyndar svínabændur uppi með pálmann í höndunum