MA vann Boxið

Lið Menntaskólans á Akureyri fór með sigur af hólmi í Boxinu, framkvæmdakeppni framhaldsskólanna sem haldin var í Háskólanum í Reykjavík í dag.

Metþátttaka var í Boxinu í ár en alls tóku 29 lið frá 17 skólum þátt í forkeppni sem haldin var fyrr í mánuðinum. Átta lið komust áfram í aðalkeppnina. Þau eru frá: Fjölbrautaskóla Suðurlands, Fjölbrautaskóla Suðurnesja, Flensborgarskóla, Menntaskólanum á Akureyri, Menntaskólanum í Kópavogi, Menntaskólanum í Reykjavík, Menntaskólanum við Hamrahlíð og Menntaskólanum við Sund.

Í úrslitunum fóru fimm manna lið frá hverjum skóla í gegnum fjölbreytta þrautabraut sem reyndi á bæði á hugvit og verklag. Liðin fóru á milli stöðva og fengu hálftíma til að leysa hverja þraut.

 Þetta er í fimmta sinn sem Boxið er haldið. Að keppninni standa Samtök iðnaðarins, Háskólinn í Reykjavík og Samband íslenskra framhaldsskólanema. Markmið með Boxinu er að kynna og vekja áhuga nemenda í framhaldsskólum á verk- og tækninámi og fjölbreyttum störfum í iðnaði. Það var Menntaskólinn Reykjavík sem sigraði í Boxinu í fyrra.