Telur ESB-umsóknina mögulega enn í gildi

Óvíst er hvort umsókn Íslands um aðild að ESB frá árinu 2009 sé fallin úr gildi eða hvort það myndi nægja nýrri ríkisstjórn að óska eftir því að viðræðurnar hæfust á ný.

Þetta er mat Matthias Brinkmann, sendiherra ESB á Íslandi, að því er fram kemur í umfjöllun um mál þetta í Morgunblaðinu í dag.

Samþykkt var á Alþingi sumarið 2009 að sækja um aðild að ESB og hófust viðræðurnar formlega um sumarið 2010. Það gerðist svo í janúar 2013 að vinstristjórnin setti viðræðurnar á ís, skömmu fyrir þingkosningarnar þá um vorið. Það dró svo næst til tíðinda að Gunnar Bragi Sveinsson utanríkisráðherra sendi í mars sl. bréf til formennskuríkis ESB og óskaði þess þar að Ísland yrði ekki lengur álitið umsóknarríki. Ríkisstjórnin hefði ekki í hyggju að hefja aðildarviðræðurnar á ný.