Jólatré framtíðar skoðuð í Heiðmörk

Dagur B. Eggertsson borgarstjóri og Khamshajiny Gunaratnam, aðstoðarborgarstjóri í Ósló, sóttu Heiðmörk heim í dag. Tók þar fulltrúi Skógræktarfélags Reykjavíkur á móti þeim og sýndi grenitré í Norðmannalundi, en Ósló mun á næsta ári gefa Reykvíkingum tré þaðan. Kveikt var á síðasta jólatrénu frá Noregi á Austurvelli í dag.

„Við höldum í hefðina en sækjum trén í Heiðmörk en fáum áfram fulltrúa Oslóar til að vera með okkur á Austurvelli,“ segir Dagur B. á Facebook-síðu og bætir því við að gullfallegur dagur hafi verið þegar hann og Khamshajiny, sem gjarnan er kölluð Kamsy, heimsóttu Heiðmörk.

Kamsy er ein þeirra sem stödd voru í Útey þegar vopnaður ódæðismaður hóf þar skothríð á bjargarlaust fólk. Komst hún lífs af með því að stinga sér til sunds.

Dagur B. og Kamsy heimsóttu því einnig minningarlundinn um fórnarlömb hryðjuverkanna í Noregi 22. júlí 2011, en lundurinn er við jaðar friðaða svæðisins í Vatnsmýrinni, skammt frá Norræna húsinu.

„Það var fallegt og friðsælt að heimsækja minningarlundinn um fórnarlömbin í Útey og Osló með Khamsy, varaborgarstjóra Oslóar, sem bjargaði sér á sundi frá Útey og var ein þeirra sem lifðu voðaverkin af. Lundurinn þar sem gróðursettar voru 77 bjarkir og 8 reynitré, eitt fyrir hver fórnarlamb, mun verða fallegri með hverju ári,“ segir Dagur B. á Facebook-síðu sinni.

• 1 blogg um fréttina

Bloggað um fréttina

• Óðinn Þórisson: Viðburðarstjórinn Dagur B.