Óbreytt afstaða Íslands

Kolbeinn Árnason, framkvæmdastjóri Samtaka fyrirtækja í sjávarútvegi, segir óbreytta afstöðu Íslands til viðskiptaþvingana ESB og Bandaríkjanna í garð Rússlands kosta íslenskan sjávarútveg átta til 12 milljarða á ársgrundvelli.

Evrópusambandið samþykkti á föstudag að framlengja viðskiptaþvinganir gagnvart Rússum um sex mánuði og segir Gunnar Bragi Sveinsson utanríkisráðherra það þýða óbreytt ástand hvað varðar Ísland.

Í umfjöllun um mál þetta í Morgunblaðinu í dag segir Kolbeinn makrílafurðir hafa lækkað um 20 til 25 prósent frá því Rússar svöruðu viðskiptaþvingunum gegn sér með innflutningsbanni á matvælum landa er standa að þvingununum.