Vilja álið beint úr álveri

„Það er ekki mjög umhverfisvænt að rúnta með ál um allan heim, sem hugsanlega er framleitt á Íslandi, og nýta það síðan nánast á sama stað og það var upphaflega framleitt.“

Þetta segir Ingólfur Árnason, framkvæmdastjóri Skagans á Akranesi, í Morgunblaðinu í dag. Fyrirtæki hans nýtir mikið af áli í framleiðslu á plötufrystum fyrir fiskvinnslu og aðra matvælaframleiðslu.

Í stað þess að flytja það allt inn vonast Ingólfur til að innan tveggja ára verði fyrirtækið í stakk búið til þess að kaupa álið beint af framleiðanda, t.d. frá Grundartanga. Ingólfur segir að nú kaupi Skaginn ál í framleiðslu sína frá Ítalíu og þar er málmurinn forunninn að hluta.