Innlent | mbl | 18.1.2016 | 16:12 | Uppfært 19.1.2016 14:37

Þrjár fjölskyldur hættu við

Von er að hluta hópsins á morgun. AFP

Fyrsti hópur sýrlenska flóttafólksins sem boðin hefur verin búseta hér á landi kemur á morgun með flugi frá Beirút. Hópurinn samanstendur af sex fjölskyldum, þar af eru 13 fullorðnir og 22 börn.

Fjórar þessara fjölskyldna munu setjast að á Akureyri en tvær þeirra í Kópavogi. Líkt og áður hefur komið fram gerði velferðarráðuneytið samninga við Akureyri, Kópavog og Hafnarfjörð í nóvember síðastliðnum um móttöku 55 sýrlenskra flóttamanna. Ráðgert var að fólkið kæmi til landsins í lok desember sl. en af óviðráðanlegum ástæðum reyndist það ekki mögulegt.

Þetta kemur fram á vefsíðu velferðarráðuneytisinsins.

Af fjölskyldunum sex sem koma á morgun munu fjórar þeirra setjast að á Akureyri, samtals 23 einstaklingar, en tvær í Kópavogi. Barnshafandi kona sem fyrirhugað var að kæmi á morgun ásamt fjölskyldu sinni reyndist ekki fær um að takast á hendur ferðalagið og frestast því koma þeirra til landsins.

Þrjár fjölskyldur til viðbótar sem höfðu lýst áhuga á að setjast að á Íslandi hættu við að koma. Flóttamannastofnun Sameinuðu þjóðanna hefur í samvinnu við íslensk stjórnvöld undirbúið komu hóps flóttafólks í stað þeirra sem sáu sér ekki fært að koma. Stefnt er að því að sá hópur komi innan fárra vikna og að fólkið setjist að í Hafnarfirði og Kópavogi.

Eygló Harðardóttir, félags- og húsnæðismálaráðherra, segir gleðiefni að loksins sé komið að því að bjóða flóttafólkið velkomið í verki:

„Ég veit að sveitarfélögin hafa undirbúið sig vel á allan hátt og munu gera allt sem í þeirra valdi stendur til að fólkinu líði vel og finni að það er meðal vina. Rauði krossinn mun miðla af reynslu sinni og þekkingu í sama skyni og það er virkilega ánægjulegt að vita hvað sjálfboðaliðar hafa reynst boðnir og búnir að bjóða fram stuðning sinn og aðstoð við að taka á móti fólkinu og aðstoða það meðan það er að átta sig á aðstæðum hér og kynnast samfélaginu.“

Eygló leggur áherslu á að móttaka flóttafólks verði áfram viðfangsefni íslenskra stjórnvalda og að í undirbúningi sé móttaka fleiri hópa á þessu ári.