Innlent | mbl | 13.2.2016 | 19:17 | Uppfært 19:35

Vilja að Landsbankinn verði samfélagsbanki

Eignarhlutur ríkisins í Landsbankanum er stærsta eign ríkissjóðs. mbl.is/Eggert Jóhannesson

Flokksráð Vinstri grænna vill að Landsbanki Íslands verði rekinn sem samfélagsbanki í eigu hins opinbera og í þágu fólksins í landinu. Segir í ályktun ráðsins að ríkisstjórnin hafi ekki farið leynt með áform sín um að einkavæða banka og fjármálastofnanir í almannaeigu.

Flokksráðið hélt fjölmennan fund á Hallveigarstöðum í dag og afgreiddi fjölda ályktana. Segir í þessari ályktun, um gagnsæi við uppstokkun fjármálakerfisins, að mikilvægt sé að samfélagsleg umræða fari fram „við uppstokkun fjármálakerfisins, hlutverk ríkisins í því og framtíðarskipulag enda um hagsmuni almennings að ræða.“

Brýnt að rannsaka Borgunarmálið

Þar segir einnig að „Borgunarhneykslið“ sýni skýrt hversu mikilvægt sé að söluferli banka, eignum þeirra og eignarhlutum ríkisins í þeim verði gegnsætt, og að fyllsta jafnræðis sé gætt við það ferli.

„Brýnt er að rannsaka Borgunarmálið til hlítar og tekin verði ábyrgð á því sem þar fór úrskeiðis enda um gríðarlega hagsmuni að ræða er varðar almenning.“

Krefst ráðið þess að fram fari rannsókn á einkavæðingu bankakerfisins árið 2003. Með öllu óboðlegt sé, eftir fall bankakerfisins „og án fullnægjandi rannsóknar á einkavæðingu fjármálakerfisins í aðdraganda Hrunsins, skuli stefnt að annarri einkavæðingu fjármálastofnanna í opinberri eigu.“

Ályktanir flokksráðsins má nálgast á vefsíðu Vinstri grænna.