Þarf að greiða kostnað að fullu

Ung kona sem uppgötvaði að hún væri þunguð rétt áður en hún flutti frá Bandaríkjunum heim til Íslands þarf að greiða kostnað við mæðravernd að fullu.

Í reglum Sjúkratrygginga Íslands gildir sex mánaða biðregla fyrir einstaklinga sem flytja frá ríki utan EES til Íslands, að því er fram kemur í umfjöllun um mál þetta í Morgunblaðinu í dag.

Hægt er að veita undanþágu frá sex mánaða reglunni í sérstökum tilfellum sem eru talin upp í lögum um sjúkratryggingar en meðganga fellur ekki undir það því hún telst ekki til sjúkdóms, margreynt hefur á það fyrir úrskurðarnefnd sjúkratrygginga. Ef einstaklingar fá ekki undanþágu frá 6 mánaða biðtíma þá er ekki um neina endurgreiðslu að ræða sem af lækniskostnaði hlýst.

Þessi biðtími er til þess að koma í veg fyrir að einstaklingar flytji hingað til að fá þjónustu sem sjúkratryggðir án þess að vera að flytja hingað í raun. Sjúkratryggingar Íslands hafa reynt að fá þennan tíma lækkaðan niður í þrjá mánuði en hafa ekki náð því í gegn.

Hefur konan hingað til þurft að greiða nær 100 þúsund krónur fyrir mæðraeftirlit og skoðanir. Verði hún ekki komin inn í sjúkratryggingakerfið fyrir fæðingu mun venjuleg fæðing kosta hana 154 þúsund krónur en keisaraskurður um milljón, komi til þess.