„Það verður farið yfir málið og það skoðað út frá því áhættumati sem verður fyrirliggjandi,“ segir Ólafur Helgi Kjartansson, lögreglustjóri á Suðurnesjum.
Í dag fer fram fundur fulltrúa lögreglustjórans á Suðurnesjum, ríkislögreglustjóra og innanríkisráðuneytis um þörfina fyrir áframhaldandi vopnaða gæslu á Keflavíkurflugvelli. Gæslan var aukin um miðja síðustu viku í kjölfar hryðjuverkanna í Brussel í Belgíu.
Fram til þessa hafa sex vopnaðir lögreglumenn og sérsveitarmenn verið við gæslu á Keflavíkurflugvelli, ásamt sérsveitarmanni með sprengjuleitarhund eftir því sem við hefur átt.