Alþjóðleg umfjöllun um gagnaleka, sem sýnir meðal annars fram á tengsl íslenska forsætisráðherrans við félag á Bresku-Jómfrúareyjum, hefst samtímis á RÚV og í mörgum erlendum miðlum í kvöld klukkan sex að íslenskum tíma. Í frétt RÚV segir að lekinn sé sá „umfangsmesti sem um getur í heiminum.“

Í frétt RÚV kemur fram að í gögnunum sé fjallað um viðskiptavini lögmannsstofu í Mið-Ameríku, sem hefur m.a. sérhæft sig í að útvegaviðskiptavinum evrópskra banka félög í skattaskjólum.

Ásamt Alþjóðasamtökum rannsóknarblaðamanna hafa margir fjölmiðlar, s.s. þýska dagblaðið Süddeutsche Zeitung, danska ríkissjónvarpið, sænska ríkissjónvarpið og Reykjavík Media í samvinnu við Kastljós, undirbúið umfjöllun um málið.

Fjölmiðlarnir munu hefja umfjöllun samtímis kl. 18 að íslenskum tíma. Í Kastljósþættinum verður fjallað um tengsl íslenskra stjórnmálamanna við aflandsfélög.

Í frétt RÚV segir að með gögnunum sé hægt að rekja hvernig evrópskir bankar hafi hjálpað viðskiptavinum sínum að færa peninga í skattaskjól.

Stikla úr þættinum Uppdrag granskning sem sýndur verður í sænska ríkissjónvarpinu í kvöld: