Innlent | mbl | 9.4.2016 | 14:42

Austurvöllur fullur af fólki

Mikill fjöldi fólks er nú á Austurvelli til að mótmæla ríkisstjórn Íslands. Hafa margir tekið með sér potta, pönnur og mótmælaskilti auk þess sem nokkrir slá á trumbur.

Fjöldi fólks streymir nú í átt að miðbænum að sögn ljósmyndara mbl.is sem er á vettvangi en yfirskrift mótmælanna er „Kosningar strax - ríkisstjórnina burt.“

Arnar Marteinsson, aðalvarðstjóri hjá lögreglunni á höfuðborgarsvæðinu, segir í samtali við mbl.is að nú, laust fyrir klukkan 15, séu um 5.500 manns á Austurvelli og „mikið streymi“ inn og út af svæðinu.

Búið er að setja upp svið á Austurvelli og munu hinir ýmsu tónlistarmenn koma þar fram. Meðal þeirra sem flytur ávarp er Illugi Jökulsson rithöfundur og er fundarstjóri Sigríður Bylgja Sigurjónsdóttir.

Á skiltum mótmælenda stendur meðal annars; „Hvar er stjórnarskráin“, „Bring it on“, „Mennska framtíð“, „Réttlæti en ekki ranglæti“, og „Þjóðníðingar - SDG+BB“.

Lögreglan á höfuðborgarsvæðinu er með nokkurn viðbúnað vegna mótmælanna en lögreglumenn hafa að mestu haldið sig til hlés.

Fylgst verður með mótmælunum á mbl.is í dag.